Ապրիլի 7-ի երեկոյան Սայդա քաղաքի առափնյա հատվածին հասցված իսրայելական հարվածի հետևանքով զոհեր և վիրավորներ կան։ Այս մասին հայտնում է Լիբանանի առողջապահության նախարարությունը։
«Սրճարանին հասցված թշնամական հարվածի հետևանքով 8 մարդ մահացել է, 28–ը` վնասվածքներ ստացել»,-ասված է հաղորդագրության մեջ։
Հիշեցնենք` ապրիլի 8-ին ԱՄՆ նախագահ Դոնալդ Թրամփը համաձայնել է երկու շաբաթով դադարեցնել Իրանի ուղղությամբ հարվածները և հավաստիացրել է, որ հրադադարը կլինի երկկողմանի։ Իրանի ազգային անվտանգության գերագույն խորհուրդը հայտարարել է, որ Թեհրանը ԱՄՆ-ի հետ բանակցություններ կսկսի ապրիլի 10-ին Իսլամաբադում (Պակիստան)։
Իրանական կողմը հայտարարել է, որ ԱՄՆ–ն ստիպված է եղել ընդունել Թեհրանի` 10 կետից բաղկացած առաջարկը, որը ներառում է Հորմուզի նեղուցի նկատմամբ վերահսկողության պահպանում և պատերազմի դադարեցում բոլոր ճակատներում, այդ թվում՝ Լիբանանի իսլամական դիմադրության դեմ։
Միևնույն ժամանակ, ինչպես հայտնում է «Times of Israel»-ը, Իսրայելի վարչապետ Բենիամին Նեթանյահուի գրասենյակից հայտարարել են, որ Իրանի, ԱՄՆ-ի և Իսրայելի միջև երկշաբաթյա հրադադարի մասին համաձայնագիրը չի տարածվում Լիբանանի վրա։
Ապրիլի 8-ի առավոտյան Իսրայելի պաշտպանության բանակը (ՑԱԽԱԼ) հայտարարել է Լիբանանի Տյուրոս քաղաքի Աբասիա թաղամասին հարվածներ հասցնելու մտադրության մասին, բնակիչներին խորհուրդ է տրվում հեռանալ այնտեղից։