Արցախցիների բռնի տեղահանումից հետո Հայաստանում պետական մակարդակով ցուցաբերվեց անբարյացակամ ու անհոգի վերաբերմունք։ Այս մասին այսօր ՀՀԿ 18-րդ համագումարի ժամանակ հայտարարեց կուսակցության նախագահ, ՀՀ 3-րդ նախագահ Սերժ Սարգսյանը։ Նրա խոսքով՝ ՀՀ իշխանությունները հանցավոր անգործություն են ցուցաբերում Բաքվում պահվող հայերի նկատմամբ։
«Իշխանությունների կողմից առկա է հանցավոր անգործություն և հաճախ դատարկ խոստումներ՝ անհետ կորածների որոնման և մինչ օրս Բաքվի բանտերում զրկանքների ու գերության մեջ գտնվող մեր հայրենակիցներին հայրենիք վերադարձնելու ուղղությամբ։ Տղե՛րք, ես ձեզ հետ եմ ամեն օր, ամեն ժամ՝ մտքով ու սրտով, և հավատում եմ, որ մի օր մենք հանդիպելու ենք։ Ձեր արժանապատիվ կեցվածքն այդ անմարդկային պայմաններում ավելի խոսուն է և հարգանքի արժանի, քան ազատության մեջ շատերի պահվածքը»,- ասաց Սարգսյանը` դիմելով Բաքվում պահվող Արցախի ռազմաքաղաքական ղեկավարությանը։
Սերժ Սարգսյանը, դիմելով կուսակիցներին, նշեց, որ Հայաստանը չի կարող ընդունել, թե ամեն ինչ ավարտված է և Արցախի էջը փակված է, ինչպես փորձում է պարտադրել գործող իշխանությունը։
«Միջազգային երաշխիքների ներքո արցախահայերի՝ իրենց բնակավայրեր արժանապատիվ վերադարձի իրավունքն անքակտելի է, և որևէ մեկը չի կարող արցախցիներին զրկել այդ իրավունքից»,- շարունակեց Սերժ Սարգսյանը։
Հիշեցնենք` Բաքվում ընթացող Արցախի նախկին ռազմաքաղաքական առաջնորդների գործով «դատավարությունը», որը սկսվել էր 2025 թվականի հունվարին, ավարտվել է, և դատարանը փետրվարի 5–ին հրապարակել է դատավճիռները` ցմահ ազատազրկման են դատապարտվել Արցախի Հանրապետության նախկին նախագահ Արայիկ Հարությունյանը, ՊԲ նախկին հրամանատար Լևոն Մնացականյանը և ՊԲ հրամանատարի նախկին տեղակալ Դավիթ Մանուկյանը։ Արցախի նախկին նախագահներ Արկադի Ղուկասյանն ու Բակո Սահակյանը դատապարտվել են 20 տարվա ազատազրկման։
Քաղաքացիական գերիներ Մադաթ Բաբայանը և Մելքիսեթ Փաշայանը դատապարտվել են 19 տարվա ազատազրկման, Գարիկ Մարտիրոսյանը՝ 18, Դավիթ Ալահվերդյանը և Լևոն Բալայանը՝ 16, Էրիկ Ղազարյանը, Գուրգեն Ստեփանյանը, Վասիլ Բեգլարյանը՝ 15 տարվա ազատազրկման։
Արցախի նախկին պետնախարար Ռուբեն Վարդանյանի «գործը» քննվում էր առանձնացված վարույթով։ Փետրվարի 17-ին հայտնի դարձավ, որ Բաքվի դատարանը Ռուբեն Վարդանյանին 20 տարվա ազատազրկման է դատապարտել: