ԵՐԵՎԱՆ, 3 ապրիլի – Sputnik. Հայաստանի սպառողական շուկայում 12–ամսյա գնաճը (2026 թ. մարտը 2025 թ. մարտի նկատմամբ) կազմել է 4.5 %, իսկ նախորդ ամսվա նկատմամբ՝ 0.7 %: Այդ մասին այսօր հայտնել է ՀՀ վիճակագրական կոմիտեն «Սպառողական գների ինդեքսը ՀՀ–ում 2026 թ. հունվար–մարտին» զեկույցում։
Նշենք, որ այս տարվա փետրվարին 12–ամսյա գնաճը (2025թ. փետրվարի նկատմամբ) կազմել էր 4.3 %, իսկ հունվարին` 3.8 %:
2026 թ. մարտին 2025 թ. մարտի համեմատ արձանագրվել է սննդամթերքի և ոչ ալկոհոլային խմիչքի 7.8 % գնաճ:
Դիտարկվող ժամանակահատվածում Հայաստանում պարենային հիմնական ապրանքախմբի մեջ ամենից բարձր եղել է կաթնամթերքի, պանրի և ձվի գնաճը` 12.8 %, ծխախոտային արտադրատեսակներինը` 9.7 %, օղունը` 9.2 %, սուրճ, թեյ և կակաո ապրանքախմբինը` 7.7 %, յուղերի և ճարպերինը` 7.5 %։
2026 թ. մարտին 2025 թ մարտի համեմատ ոչ պարենային ապրանքների շուկայում գներն աճել է 0.8 %–ով։ Այս ապրանքախմբում ամենից բարձր եղել է ոսկերչական զարդերի գնաճը 54.5 %–ով, իսկ ամենամեծ գնանկումը եղել է սիրողական այգեգործության բնագավառում` 12.8 %–ով։
Սպառողական գների փոփոխությունը Հայաստանում
© Sputnik / Zara Mika
Վիճակագրական կոմիտեից հայտնում են, որ գները նվազել են բենզինի և դիզելային վառելիքի շուկաներում` համապատասխանաբար 6.3 %–ով և 5.9 %–ով։ Ինչ վերաբերում է հեղուկ ածխաջրածիններին (բութան, պրոպան և այլն), ապա այս շուկայում գները 0.2 %–ով աճել են։
Ըստ հրապարակված տվյալների` 2026 թ. մարտին 2025 թ. մարտի համեմատ սակագներն աճել են նաև բնակչությանը մատուցված ծառայությունների ոլորտում` 2.6 %–ով։ Այս բնագավառում ամենից բարձր գնաճը եղել է հանգստի կազմակերպման համալիր ծառայություններում` 16.4 % և տրանսպորտի ապահովագրության ոլորտում` 11.7 %։
Միրգ–բանջարեղենի շուկայում ևս արձանագրվել է գնաճ, 2026 թ. մարտին 2025 թ. մարտի համեմատ ամենից թանկ եղել է կիտրոնը, որի գներն աճել են 25.6 %–ով, լոլիկը` 22.3 %–ով, նուռը` 21.7 %–ով, սմբուկը` 21.3 %–ով, մանդարինը` 19.8 %–ով և այլն։
2026 թ. մարտին ԱՄՆ դոլարի նկատմամբ հայկական դրամի միջին հաշվարկային փոխարժեքը կազմել է 377.4 դրամ (2025 թ. մարտին այն կազմել է 392.8 դրամ):