ԵՐԵՎԱՆ, 30 մարտի – Sputnik. Հայաստանի Հանրապետությունում Իրանի Իսլամական Հանրապետության դեսպան Խալիլ Շիրղոլամին ցավակցական ուղերձ է հղել Սպահանում ամերիկա-իսրայելական ռմբակոծության հետևանքով իրանահայ Հովհաննես Սիմոնյանի զոհվելու կապակցությամբ։
Ինչպես հայտնի է, Նոր Ջուղայի բնակիչ Հովհաննես Սիմոնյանը իր աշխատասենյակում զոհվել էր մարտի 26–ին Սպահանի ռմբակոծության ժամանակ։ Ավելի ուշ ՀՀ արտգործնախարարությունը հայտնել էր, որ Իրանում զոհված հայը` Նոր Ջուղայի բնակիչ Հովհաննես Սիմոնյանը, ՀՀ քաղաքացիություն չի ունեցել։
«Սիրված իրանահայ Հովհաննես Սիմոնյանը նահատակվեց Սպահանում՝ ոճրագործ ԱՄՆ-ի և Իսրայելի դաժան հարձակման հետևանքով։ Խոնարհվում ենք նրա վեհ հոգու առաջ և աղոթում ենք, որ Հիսուս Քրիստոսի և Մարիամ Աստվածածնի սուրբ ոգին ագրեսորների չարիքը հեռու պահի մեր սիրելի Իրանից և նրա հայ համայնքից»,–նշել է դեսպանն իր ուղերձում։
Հիշեցնենք` ԱՄՆ-ն և Իսրայելը փետրվարի 28-ի առավոտյան սկսեցին հարվածներ հասցրել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Երկրում 40-օրյա սուգ է հայտարարվել: Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: