ԵՐԵՎԱՆ, 13 մարտի – Sputnik․ ՀՀ քննչական կոմիտեն այսօր էլ Գերագույն հոգևոր խորհրդի հոգևորական անդամներին է հարցաքննության կանչել։ Այս մասին գրում է «Փաստինֆոն»՝ վկայակոչելով իր աղբյուրները։
Ըստ ԶԼՄ-ի՝ այսօր առավոտյան ՔԿ-ն կրկին փորձել է տապալել նիստը։
Երեկ հայտնել էինք, որ Գերագույն հոգևոր խորհրդի աշխարհիկ 4 անդամներ ՀՀ քննչական կոմիտե են հրավիրվել հարցաքննության։ Եվ հրավիրալ այն ժամին, երբ նշանակված էր հոգևոր խորհրդի հերթական նիստը։
«Ժամը 10-ին այս անգամ արդեն հոգևորական անդամներին կրկին, «անհետաձգելի քննչական գործողությունների» անվան տակ, հրավիրել են հարցաքննության։ Հոգևոր հայրերը հրաժարվել են գնալ հարցաքննության՝ նշելով, որ ՔԿ-ն պարտավոր է ծանուցագիր ուղարկել»,- գրում է կայքը։
Ավելի ուշ ծանուցագիրը էլեկտրոնային տարբերակով ուղարկվել է, սակայն նիստը կայացել է։
Հիշեցնենք՝ փետրվարի 14-ին հայտնի դարձավ, որ Գարեգին Երկրորդի նկատմամբ քրեական հետապնդում է հարուցվել Մասյացոտնի թեմի նախկին առաջնորդ, կարգալույծ արված Արման Սարոյանի հետ կապված դատական ակտի կատարումը խոչընդոտելու մեղադրանքով։ Արգելվել է նրա ելքը Հայաստանից:
Մինչ այդ դատարանը երկրից բացակայելու արգելքը որպես խափանման միջոց էր ընտրել Մայր աթոռի արտաքին հարաբերությունների և արարողակարգի բաժնի տնօրեն Նաթան արքեպիսկոպոս Հովհաննիսյանի, Եկեղեցականաց և երիտասարդաց վերապատրաստման ծրագրերի տնօրեն Վահան եպիսկոպոս Հովհաննիսյանի, Մայր աթոռի միաբան Հայկազուն արքեպիսկոպոս Նաջարյանի, Մայր աթոռի վարչատնտեսական բաժնի տնօրեն Մուշեղ եպիսկոպոս Բաբայանի, Գուգարաց թեմի առաջնորդ Հովնան եպիսկոպոս Հակոբյանի ու Սյունիքի թեմի առաջնորդ Մակար սրբազանի և Գերագույն հոգևոր խորհրդի քարտուղար տեր Մովսես քահանա Սահակյանի նկատմամբ։