ԵՐԵՎԱՆ, 7 մարտի – Sputnik․ Ռազմական գործողությունների մեկնարկից ի վեր Կատարում ՀՀ դեսպանության հետ կապ է հաստատել Կատարի տարածքում տարանցիկ գտնվող ՀՀ 41 քաղաքացի, որոնց հետ մշտական կապ է պահվում։ Այս մասին հայտնում է ՀՀ ԱԳՆ խոսնակ Անի Բադալյանը ֆեյսբուքյան պաշտոնական էջում։
«Նշյալ քաղաքացիներից 38-ի համար, ովքեր ճամփորդելիս են եղել «Qatar Airways»-ի միջոցով, ավիաընկերության կողմից ապահովվել են կեցության, սննդի բոլոր պայմանները»,- գրում է Բադալյանը։
Նրա խոսքով՝ քաղաքացիներից երկուսը դեղորայքի կարիք են ունեցել, նրանց համապատասխան աջակցություն է ցուցաբերել Դոհայում ՀՀ դեսպանությունը։
Մարտի 6-ին դեսպանությունում կազմակերպվել է քննարկում՝ Դոհայում մնացած ՀՀ բոլոր քաղաքացիների մասնակցությամբ։ Դեսպանության կողմից գնահատվել են կարիքները։
Ըստ ԱԳՆ խոսնակի` Կատարի տարածքում են ևս 3 քաղաքացիներ, որոնց համար ևս դիտարկվում են վերադարձի հնարավոր տարբերակներ։
Բադալյանը նաև ընդգծում է, որ «Qatar Airways» ընկերության մարտի 9-ի չվացուցակում այս պահի դրությամբ ներառված է դեպի Երևան չվերթը։
Հիշեցնենք, որ ի պատասխան ամերիկա-իսրայելական հարձակման՝ Իրանը հարվածներ է հասցրել Պարսից ծոցի երկրներում տեղակայված օբյեկտների ուղղությամբ։ Վնասվել են Դուբայի օդանավակայանը, որն օրական շուրջ 1000 չվերթ է սպասարկում, ինչպես նաև Աբու Դաբիի օդանավակայանը։ Չեղարկվել են հազարավոր չվերթեր, այդ թվում` Դուբայից, Աբու Դաբիից և Շարժայից դեպի Հայաստան և հակառակ ուղղությամբ։