ԵՐԵՎԱՆ, 19 փետրվարի – Sputnik․ Երևանի Աջափնյակ թաղամասում փետրվարի 18–ին տեղի ունեցած դեպքը պետք է պատշաճ գնահատականի արժանանա։ Այս մասին այսօր ՀՀ կառավարության նիստից հետո ճեպազրույցի ժամանակ ասաց ՀՀ մարդու իրավունքների պաշտպան Անահիտ Մանասյանը` նշելով` այն, որ նման միջադեպեր են տեղի ունենում մեր երկրում և այն էլ բոլորի աչքի առաջ, նորմալ երևույթ չէ։
Հայտնել ենք, որ փետրվարի 18–ին` ժամը 16:00-ի սահմաններում, կրակոցներ են հնչել Երևանի Աբելյան փողոցում, կա 1 զոհ, 6 վիրավոր։
«Տեղի ունեցածը նաև մարդկանց մշակույթի և կրթության հետ կապված խնդրահարույց իրավիճակի արդյունք է։ Համարում եմ, որ այդ առումով ամբողջ կրթական համակարգը պետք է բարեփոխվի, բայց, բնականաբար, իրավապահ տարբեր մարմիններ պետք է նաև պատշաճ աշխատանք իրականացնեն»,– նշեց Մանասյանը` ավելացնելով, որ կանխարգելիչ աշխատանքներ իրենց կառույցը չի կարող իրականացնել։
Լրագրողի հարցին, որ դեպքը տեղի է ունեցել օրը ցերեկով, բոլորի աչքի առաջ, ընդ որում` տարածքում եղել են երեխաներ, արդյոք հնարավոր չէ՞ր իրականացնել կանխարգելիչ միջոցառումներ, օմբուդսմանը պատասխանեց` այն, որ նման իրավիճակ ունենք, խոսում է այն մասին, բավարար չէ բոլոր պատկան մարմինների կատարած աշխատանքը։
«Այն կոնտենտը, որ մենք տարածում ենք, այդ թվում` հրապարակային եղանակով տարբեր հարաբերությունների, հարցերի հետ կապված, այն լեզուն, որ կիրառում ենք, դա միանշանակ նպաստում է նման երևույթների ավելի զարգացմանը։ Այս առումով պայքար պետք է մղել, ու ոչ միայն իրավապահների շրջանակում, այլ ամենքս մեր մասով` մեր դերակատարությունն ու գործառույթը հաշվի առնելով»,– ընդգծեց ՄԻՊ–ը։
Հիշեցնենք` իրավապահները դեպքի վայրում հայտնաբերել էին ատրճանակից ու ինքնաձիգից արձակված կրակոցի հետքեր, դանակ և արյան հետքեր։ Երևանի Աջափնյակ վարչական շրջանում արյունալի դեպքից հետո «Արմենիա» ԲԿ տեղափոխված 7 վիրավորներից մեկը հենց վիրասեղանին է մահացել, մյուս 6-ին վիրահատել են, նրանց վիճակը ներկա դրությամբ կայուն է, որևէ մեկի կյանքին վտանգ չի սպառնում։