ԵՐԵՎԱՆ, 19 փետրվարի – Sputnik․ ՀՀ առողջապահության նախարարությունը քննարկում է օնլայն տաքսիների վարորդների առաջարկը` ներառվելու համընդհանուր առողջության ապահովագրության մեջ։ Այդ մասին այսօր ՀՀ կառավարության նիստից հետո ճեպազրույցի ժամանակ ասաց առողջապահության նախարար Անահիտ Ավանեսյանը։
Ավելի վաղ հայտնել էինք, որ օնլայն տաքսիների վարորդները ակցիա են կազմակերպել Երևանում՝ բողոքելով իրենցից գանձվող բարձր տոկոսներից։ Վարորդները պահանջում են, որ ամեն պատվերից վարորդից գանձվող տոկոսադրույքն իջեցվի, իրենք էլ գրանցվեն որպես օրինական աշխատողներ, որ կարողանան նաև օգտվել առողջության համընդհանուր ապահովագրությունից։
«Ինձ համար շատ ուրախալի է, որ մեր տաքսիի վարորդները, տեսնելով ապահովագրության այն կարևոր ձեռքբերումը, որ այլ քաղաքացիներ ունեն, իրենք ևս հայտ են ներկայացրել ընդգրկվելու ապահովագրության շրջանակում։ Մենք առաջիկայում կքննարկենք այս հարցերը և կհասկանանք` ինչ հնարավորություններ ունենք մինչև 2027 թ. հունվարի 1–ը նրանց ևս դիտարկելու»,– հայտարարեց նախարարը` հիշեցնելով, որ քաղիրավական պայմանագրերով աշխատող անձինք, ըստ օրենքի, ապահովագրության մեջ պետք է ներառվեն 2027 թ.–ի հունվարի 1–ից։
Հիշեցնենք, որ ՀՀ էկոնոմիկայի նախարար Գևորգ Պապոյանն այսօր հայտնել էր, որ քննարկում է նախաձեռնել Կենտրոնական բանկի, Հայաստանի բանկերի միության և «Յանդեքս» ընկերության հետ՝ հարկեր վճարող ու թափանցիկ աշխատող տաքսիստների վարկավորման մասով։