ԵՐԵՎԱՆ, 11 փետրվարի – Sputnik. Ադրբեջանի նախագահ Իլհամ Ալիևի հայտարարությունները կհամարվեն Հայաստանի ներքին գործերին միջամտություն, թե ոչ, այդ գնահատականը կարող է տալ միայն ՀՀ հեռուստատեսության և ռադիոյի հանձնաժողովը։ Այդ մասին այսօր Ազգային ժողովում հայտարարեց ՀՀ բարձր տեխնոլոգիական արդյունաբերության նախարար Մխիթար Հայրապետյանը` պատասխանելով «Հայաստան» խմբակցության պատգամավոր Արմենուհի Կյուրեղյանի հարցին։
Նշենք, որ ԱԺ–ում քննարկվում է «Տեսալսողական մեդիայի մասին» օրենքում փոփոխություններ և լրացումներ կատարելու մասին ՀՀ օրենքի նախագիծը, ըստ որի` օտարերկրյա հեռուստառադիոծրագրերում ՀՀ ներքաղաքական կյանքին միջամտող բովանդակության տարածումը կարգելվի օրենքով։
Պատգամավորը նախարարից հետաքրքրվեց` արդյոք Ադրբեջանի նախագահ Իլհամ Ալիևի հայտարարությունները կհամարվեն Հայաստանի ներքին գործերին միջամտություն, եթե նրա խոսքը հեռարձակողը կամ վերահեռարձակողը մեջբերում է եթերում, արդյոք դա կհամարվի՞ խախտում։
«Ես, թերևս, մնամ անսասան և նորից չտրվեմ սադրանքին։ Ես ձեզ կառաջարկեմ առաջնորդվել ինստիտուցիոնալ մոտեցմամբ. երբ խոսում ենք ոլորտի քաղաքականության մշակման մասին, անձնական սուբյեկտիվ մոտեցումները բացառենք»,– ի պատասխան հայտարարեց նախարար Հայրապետյանը։
Ավելի հստակեցնելով իր խոսքը` նախարարն ասաց, որ Ալիևի հայտարարությունները ներքին գործերին միջամտություն կարող են դիտվել կամ ոչ, և հեռարձակողը կարող է կրել պատասխանատվություն կամ ոչ, դա իր գնահատման տիրույթում չէ, այլ կարգավորող, սահմանադրական մարմնի` ՀՌՀ, գործն է։
«Այլ բան է` դուք, տիկին Կյուրեղյան, վստահո՞ւմ եք այդ մարմնին, թե՞ ոչ»,– ավելացրեց Հայրապետյանը։
Նշենք, որ «Տեսալսողական մեդիայի մասին» օրենքում փոփոխություններով կսահմանվեն տեղեկատվական պաշտպանության իրավական մեխանիզմներ, որոնք թույլ կտան զսպել արտաքին ազդեցությունները Հայաստանի տեղեկատվական դաշտի վրա՝ ապահովելով ազգային անվտանգությանը համապատասխան վերահսկողություն և վերահսկելիություն։