ԵՐԵՎԱՆ, 6 փետրվարի – Sputnik. Ադրբեջանը պատրաստ է օգնել Իրանի շուրջ լարվածության վերացման հարցում։ Ինչպես հայտնում է Ադրբեջանի նախագահի մամուլի ծառայությունը, այս մասին Իլհամ Ալիևն ասել է Իրանի պաշտպանության նախարար Ազիզ Նասիրզադեի հետ հանդիպման ժամանակ։
Ալիևը նշել է, որ մի քանի օր առաջ հեռախոսազրույց է ունեցել Իրանի նախագահ Մասուդ Փեզեշքիանի հետ։
Ադրբեջանը, նրա խոսքով, մտահոգված է տարածաշրջանում ստեղծված իրավիճակով և պատրաստ է աջակցել Իրանի շուրջ լարվածության կարգավորմանը։
Հաղորդագրության մեջ ասվում է, որ զրույցի ընթացքում անդրադարձ է եղել երկրների միջև երկկողմ հարաբերությունների զարգացմանը, կարծիքների փոխանակում է տեղի ունեցել պաշտպանության ոլորտում համագործակցության հեռանկարների վերաբերյալ։
Ադրբեջանի նախագահը նաև հայտարարել է, որ «Ադրբեջանի նախաձեռնությամբ խաղաղություն է հաստատվել Հարավային Կովկասում»։ Նա վստահություն է հայտնել, որ դա մեծ նշանակություն ունի ինչպես Ադրբեջանի, այնպես էլ Հայաստանին սահմանակից Իրանի համար։
Նշենք, որ այսօր՝ փետրվարի 6-ին, Մասկատում բանակցություններ տեղի կունենան Իրանի պատվիրակության և ԱՄՆ ներկայացուցիչներ Սթիվ Ուիտկոֆի և Ջարեդ Քուշների միջև։
Ավելի վաղ Թրամփը հայտարարել էր, որ «հսկայական նավատորմ» է շարժվում դեպի Իրան՝ հույս հայտնելով, որ Թեհրանը կհամաձայնի վերադառնալ բանակցությունների սեղանի շուրջ և կնքել, իր խոսքով, «արդար և իրավահավասար» գործարք, որը ենթադրում է միջուկային զենքից լիակատար հրաժարում:
ԱՄՆ առաջնորդը նաև հիշեցրել էր 2025 թվականի հունիսին Իրանի միջուկային օբյեկտներին «Կեսգիշերային մուրճ» (Midnight Hammer) գործողության շրջանակում իրականացրած հարվածները՝ հայտարարելով, որ «հաջորդ հարձակումը կլինի ավելի կոշտ» և կոչ արել «չհասցնել դրան»: