ԵՐԵՎԱՆ, 4 փետրվարի – Sputnik․ ՀՀ զինված ուժերում հոգևոր ծառայություն իրականացնող 42 գնդերեցներից 35-ն արդեն Մայր աթոռ են վերադարձել։ Sputnik Արմենիայի հետ զրույցում այս մասին հայտնեց Մայր աթոռի տեղակատվական համակարգի տնօրեն տեր Եսայի քահանա Արթենյանը։
Նրա խոսքով՝ պաշտպանության նախարարի հրամանով զինված ուժերում հոգևոր ծառայության լուծարումից հետո 42 գնդերեցներից 3-ն անցել են պարտադիր ժամկետային զինծառայության (նրանք ժամկետային զինծառայողներ էին– խմբ․ ), 4-ը միացել են եկեղեցու այսպես կոչված «բարենորոգման» շարժմանը։ Մյուս 35 գնդերեցները վերադարձել են Մայր աթոռ և նոր նշանակումների են սպասում։
««ՀՀ–ի և Հայաստանյայց առաքելական սուրբ եկեղեցու հարաբերությունների մասին» օրենքով եկեղեցուն իրավունք է վերապահված մշտական հոգևոր ներկայացուցիչ ունենալ զորամասում։ Իսկ Մայր աթոռի և ՊՆ-ի միջև կնքված հոգևոր ծառայության կանոնադրության համաձայն՝ ԶՈւ-ի հոգևոր ծառայությունը լուծարվում է Ամենայն հայոց կաթողիկոսի օրհնագրով և ՊՆ-ի հրամանով։ Այս 2 օրենքները հստակորեն խախտվել են»,- շեշտում է տեր Եսային։
Հոգևորականը համոզված է՝ զինված ուժերում հոգևոր ծառայության դադարեցումը չի բխում զինվորների և հայոց բանակի շահերից, ուստի նախարարի որոշումը վերանայման կարիք ունի։
Հիշեցնենք՝ հունվարի 30-ին հայտնի դարձավ, որ ՀՀ պաշտպանության նախարար Սուրեն Պապիկյանի հրամանով՝ զինված ուժերում հոգևոր ծառայությունը լուծարվում է։ Տևական ժամանակ է՝ տեղեկություններ են շրջանառվում, որ ՀՀ ԶՈւ բարձրաստիճան որոշ զինվորականներ ճնշումներ են գործադրում գնդերեցների նկատմամբ՝ Հայ եկեղեցու բարենորոգման խորհրդին, այսինքն՝ կաթողիկոսի պաշտոնանկությունը պահանջող հոգևորականներին միանալու համար։
Նշենք, որ ՀՀ ԶՈւ հոգևոր առաջնորդությունը ստեղծվել է 1997 թ. նոյեմբերի 13-ին երջանկահիշատակ Գարեգին Ա կաթողիկոսի և ՀՀ պաշտպանության նախարար Վազգեն Սարգսյանի համատեղ նախաձեռնությամբ: