Երուսաղեմի դատարանը մերժել է «Կովերի պարտեզի» վերաբերյալ հայցերը միավորելու պահանջը

ԵՐԵՎԱՆ, 14 հունվարի – Sputnik․ Երուսաղեմի շրջանային դատարանը հունվարի 9-ին մերժել է «Xana Gardens Ltd» ընկերության միջնորդությունը, որով վերջինս պահանջում էր Երուսաղեմի հայ համայնքի` «Կովերի պարտեզի» սեփականության վերաբերյալ հայցը միավորել Հայոց պատրիարքարանի կողմից ներկայացված առանձին դատական գործին։ Տեղեկությունը հայտնում է «Փրկենք Հայկական թաղամասը» ( SaveTheArQ) թվիթերյան էջը։

Հայկական համայնքը դատարանի այս որոշումը կարևոր է համարում ընթացող դատական գործընթացներ համատեքստում։

Բացի այդ, փաստաբանները նշել են, որ «Xana Gardens»-ը արդեն ավելի քան երկու տարի չի կարողացել ներկայացնել պաշտպանական հայտարարություն Հայոց պատրիարքարանի գործով, ինչը ևս խոսում է գործերի միավորման աննպատակահարմարության մասին։

Դատարանը ընդունել է, որ հայ համայնքի հայցը վերաբերում է Հայոց պատրիարքարանի կողմից «Կովերի պարտեզի» կառուցապատման շուրջ կնքված վիճահարույց համաձայնագրի իրավաչափությանը և պատրիարքարանի լիազորություններին, ինչը պահանջում է անկախ և առանձին դատական քննություն։

Հիշեցնենք` Արևմտյան Երուսաղեմում հայկական պատրիարքությունը հասութաբեր կալվածքներ ունի, որտեղ մոտ 160 բիզնես կա, և վանքն այդ բիզնեսների եկամտով է ապրում։

2021թ․ հուլիսին Երուսաղեմի պատրիարք Նուրհան Մանուկյանը, պատրիարքարանի լուսարարապետ Սևան Ղարիբյանը և անշարժ գույքի վերակացու հայր պարետ Երիցյանը փաստաթուղթ էին ստորագրել պատրիարքարանին պատկանող հողատարածքը` «Կովերի պարտեզ» կալվածքը, 99 տարի ժամկետով ավստրալացի հրեա Դանի Ռուբինշտեյնին վարձակալության տալու մասին։ Գործարարը նախատեսում էր հյուրանոց կառուցել այդ տարածքում։ Հայ համայնքը Երուսաղեմում պարբերաբար բողոքի ակցիաներ է իրականացնում այս գործարքի դեմ։

2023 թվականի նոյեմբերին հայտնի դարձավ, որ Երուսաղեմի հայոց պատրիարքությունը որոշել է չեղարկել «Կովերի պարտեզ» կալվածքի համաձայնագիրը։ Այժմ դատական գործընթաց է ընթանում։