ԵՐԵՎԱՆ, 13 դեկտեմբերի – Sputnik. «Մանկական Եվրատեսիլ» մրցույթի հաղթող ճանաչվեց Ֆրանսիայի ներկայացուցիչ Լու Դելյոզը «Ce monde» երգով։ Նա վաստակեց 248 միավոր։ Երկրորդ տեղը զբաղեցրեց Ուկրաինան ներկայացնող Սոֆյա Ներսիսյանը (177 միավոր), երրորդ տեղը` Վրաստանի պատվիրակ Անիտա Աբգարյանը (176)։
Հայաստանի պատվիրակ 12-ամյա Ալբերտ Արմենակյանը «Brave Heart» երգով զբաղեցրեց 4-րդ հորիզոնականը՝ ստանալով 175 միավոր։ Հայաստանին 12 միավոր տվեցին Մալթայի, Ուկրաինայի և Վրաստանի ժյուրիները։
«Մանկական Եվրատեսիլ 2025» երգի մրցույթն այս տարի անցկացվեց Թբիլիսիում։ Շոուն կազմակերպվել էր «Միավորված երաժշտությամբ» կարգախոսի ներքո։
Նշենք, որ ԱԺ նախագահ Ալեն Սիմոնյանը նույնպես Թբիլիսիում է։ Նա մրցույթից առաջ հաջողություն էր մաղթել Հայաստանի, Վրաստանի պատվիրակներին և Ադրբեջանի ներկայացուցչին։
Հիշեցնենք` Հայաստանը «Մանկական Եվրատեսիլ» երգի մրցույթին առաջին անգամ մասնակցեց 2007 թվականին։ «Արևիկ» խումբն այդ տարի գրավեց երկրորդ հորիզոնականը` առաջատարին զիջելով ընդամենը 1 միավորով։
Առաջին անգամ 2010 թվականին Հայաստանին հաղթանակ բերեց Վլադիմիր Արզումանյանն իր «Մամա» երգով։ Հայաստանին երկրորդ հաղթանակը բերեց Մալենան 2021 թ–ին։
«Մանկական Եվրատեսիլ 2024»–ում հաղթեց Վրաստանի ներկայացուցիչ Անդրիա Պուտկարաձեն, Հայաստանի պատվիրակ 10-ամյա Լեոն իր «Cosmic friend» երգով զբաղեցրեց 8-րդ հորիզոնականը՝ ստանալով 125 միավոր։