ԵՐԵՎԱՆ, 8 դեկտեմբերի – Sputnik․ Բաքվում այսօր շարունակվել է Արցախի նախկին պետնախարար, գործարար և բարերար Ռուբեն Վարդանյանի նկատմամբ «դատավարությունը»: Ինչպես հայտնում են ադրբեջանական ԶԼՄ-ները, այսօր ևս լսվել է «տուժողների» ցուցմունքները։
Ռուբեն Վարդանյան
© Photo
Փաստաթղթերի հրապարակման ժամանակ Ռուբեն Վարդանյանը քրեական գործին առնչվող որոշ փաստաթղթերի ծանոթանալու հնարավորություն ընձեռելու վերաբերյալ միջնորդություն է ներկայացրել: Մեղադրող կողմը չի առարկել։ Դատարանը որոշում է կայացրել ընթացիկ շաբաթվա ընթացքում ընձեռել այդ հնարավորությունը։
Հաջորդ «դատական նիստը» կկայանա դեկտեմբերի 9-ին:
Հիշեցնենք` հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:
Նախկին պետնախարար և բարերար Ռուբեն Վարդանյանի գործը քննվում է առանձին վարույթով: