ԵՐԵՎԱՆ, 4 դեկտեմբերի – Sputnik. «88» սուպերմարկետների ցանցը պաշտոնապես հերքել է, որ որևէ կապ ունի որևէ պետական պաշտոնյայի կամ նրանց ընտանիքի անդամների հետ։ Այս մասին ընկերությունը հաղորդագրություն է տարածել։
«Երկար ժամանակ շրջանառվող այդ խոսակցությունները որևէ իրական հիմք չեն ունեցել, ինչի մասին բազմիցս հրապարակայնորեն տեղեկացրել ենք, իսկ վերջերս «88» սուպերմարկետների սեփականատեր Նարեկ Նալբանդյանը նաև տվել է բաց ու ուղիղ հարցազրույց, որտեղ ևս մեկ անգամ ներկայացրել է բոլոր փաստերը՝ հերքելով ստահոդ տեղեկությունները»,– ասված է հայտարարությունում։
Նշենք, որ ավելի վաղ սոցցանցերում տեղեկություն էր տարածվել, որ ՀՀ վարչապետի կնոջ` Աննա Հակոբյանի անունից մարդկանց ստիպում են իրենց բիզնեսները վաճառել կամ իրենց տարածքներում գործող բիզնեսները փակել ու տրամադրել այդ տարածքները «88» սուպերմարկետների ցանցին։
Այսօր Աննա Հակոբյանն իր ֆեյսբուքյան էջում գրառում էր արել` հերքելով այդ տեղեկությունները։ Ավելին` նա դիմել էր ՀՀ գլխավոր դատախազ Աննա Վարդապետյանին, որպեսզի դատախազությունը ստուգի «88» սուպերմարկետների ցանցի գործունեությունը։ Նա հավելել էր, որ նման արարքները հաստատվելու դեպքում քրեական պատասխանատվություն են ենթադրում։
«88» սուպերմարկետների ցանցի տնօրենությունը չի բացառում, որ այս խոսակցությունները պարզապես առողջ մրցակցության կանոններին հակասող փորձեր են։
Հայտարարարությունում նշվում է` եթե ապատեղեկատվությունը գիտակցաբար է տարածվել, ապա այդ անձը կամ անձինք պետք է պատասխանատվություն կրեն օրենքի ամբողջ խստությամբ։