ԵՐԵՎԱՆ, 23 նոյեմբերի - Sputnik. Փորձ է արվում Հայ առաքելական Սուրբ եկեղեցին կեղծ, այլընտրանքային եկեղեցով փոխարինելու, եկեղեցու ծաղրապատկերը ձևավորելու։ Այս մասին Մայր աթոռ Սուրբ Էջմիածնում Շիրակի, Տավուշի և Արագածոտնի թեմերի հոգևոր դասի նախաձեռնությամբ մատուցված Սուրբ պատարագին ասել է Հոգեշնորհ Տեր Շնորհք աբեղա Պալոյանը։ Նշենք, որ նա Ամենայն հայոց կաթողիկոսի հանդիսապետությամբ կայացած պատարագի պատարագիչն էր։
Ամենայն հայոց կաթողիկոսը պատարագին
«Անդրադարձ կատարենք մեր իրականությանը և կտեսնենք, թե ինչպես է մարտնչող տգիտության և ոգևորված հիստերիայի հենքի վրա փորձվում մեր հավատքն առ Քրիստոս, փորձվում Մայր եկեղեցու և մեր հայրերի հանդեպ մեր հնազանդությունն ու խոնարհությունը։ Արդարև, այսօր փորձվում է հայրենիքի հանդեպ մեր հավատարմությունն ու նվիրվածությունը․ փորձվում են մեր համբերությունը, հավատքի տոկունությունը և աղոթքի հարատևությունը»,–ասել է Հոգեշնորհ Տեր Շնորհքը։ Նա շեշտել է, որ եկեղեցու դեմ գործողություններում չի կարող Աստված բնակվել։
Մայր աթոռ Սուրբ Էջմիածնում Շիրակի, Տավուշի և Արագածոտնի թեմերի հոգևոր դասի նախաձեռնությամբ մատուցված Սուրբ պատարագին
Հավելենք, որ սրբազան արարողությանը ներկա են եղել Հայ եկեղեցու թեմակալ առաջնորդներ, Մայր աթոռ Սուրբ Էջմիածնի միաբանությունը, Շիրակի, Տավուշի և Արագածոտնի թեմերի հոգևոր սպասավորները, տարբեր թեմերից ժամանած ուխտավոր հայորդիներ, հասարակական և քաղաքական գործիչներ:
Հիշեցնենք` տևական ժամանակ է` ՀՀ իշխանությունը արշավ է սկսել եկեղեցու ու հատկապես կաթողիկոսի դեմ։ Ճաղերի հետևում են «Սրբազան պայքար» շարժման առաջնորդ Բագրատ արքեպիսկոպոս Գալստանյանը, Շիրակի թեմի առաջնորդ Միքայել արքեպիսկոպոս Աջապահյանը, Արագածոտնի թեմի առաջնորդ Մկրտիչ սրբազանը։