ԵՐԵՎԱՆ, 13 նոյեմբերի - Sputnik. Բաքվում այսօր շարունակվել է Արցախի նախկին ռազմաքաղաքական ղեկավարների և մյուս գերիների նկատմամբ շինծու դատավարությունը, որի ժամանակ Ադրբեջանի դատախազները տարբեր պատժաչափեր են պահանջել Արցախի ռազմաքաղաքական ղեկավարների համար։ Այս մասին գրում են ադրբեջանական լրատվամիջոցները։
«Դատավարություն» Բաքվում
© Photo
Ադրբեջանցի դատախազներն առաջարկել են ցմահ ազատազրկել Արցախի նախկին նախագահ Արայիկ Հարությունյանին, Պաշտպանության բանակի նախկին հրամանատար Լևոն Մնացականյանին և նրա տեղակալ Դավիթ Մանուկյանին, խորհրդարանի նախկին խոսնակ Դավիթ Իշխանյանի և նախկին արտգործնախարար Դավիթ Բաբայանին։
«Դատավարություն» Բաքվում
© Photo
Իսկ Մադաթ Բաբայանը, Արցախի նախկին նախագահներ Արկադի Ղուկասյանը, Բակո Սահահյանը 65 տարին լրանալու պատճառով չեն կարող դատապարտվել ցմահ ազատազրկման, ինչի համար առաջարկվել է նրանց դատապարտել 20 տարով, որից 10 տարին պետք է անցկացնեն խիստ ռեժիմի գաղութում։
Բակո Սահակյան
© Photo
Դավիթ Ալլահվերդյանին նախատեսում են դատապարտել 18, Լևոն Բալայանին՝ 17, Վասիլի Բեգլարյանին, Գուրգեն Ստեփանյանին, Էրիկ Ղազարյանին՝ 16 տարվա ազատազրկման:
Ադրբեջանական ԶԼՄ-ների տվյալներով՝ «տուժողների» ներկայացուցիչները համաձայնել են հնչեցված առաջարկներին։
Արայիկ Հարությունյան
© Photo
«Դատական» հաջորդ նիստը կշարունակվի նոյեմբերի 27-ին։
Հիշեցնենք` հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:
Նախկին պետնախարար և բարերար Ռուբեն Վարդանյանի գործը քննվում է առանձին վարույթով:
«Դատավարություն» Բաքվում
© Photo