ԵՐԵՎԱՆ, 8 նոյեմբերի – Sputnik. Հայաստանի առաջին արբանյակը՝ «Արմսաթ-1»-ը, ավարտում է իր առաքելությունը և մտնում ուղեծրից անկման (ապօրբիտացման) փուլ։ Այս մասին հայտնում է ՀՀ բարձր տեխնոլոգիական արդյունաբերության նախարարությունը։
««Արմսաթ-1»-ի առաքելության ընթացքում ստացված փորձը և ձեռք բերված տվյալներն արդեն իսկ օգտագործվում են նոր սերնդի երկրադիտարկման և հաղորդակցության արբանյակների նախագծման աշխատանքներում»,– նշված է հաղորդագրությունում։
Նախարարությունից հայտնում են նաև, որ արբանյակի` տիեզերքում գտնվելու երեքուկես տարվա ընթացքում դրա միջոցով ստացվել են Հայաստանի տարածաշրջանային բազմաթիվ տիեզերանկարներ՝ հնարավորություն տալով դրանք օգտագործել ինչպես գիտական, այնպես էլ համակարգային նշանակությամբ:
Նշվում է նաև, որ այս ծրագրի շրջանակներում հնարավորություն է ընձեռվել վերապատրաստել մասնագետների և ձևավորել մասնագիտական խմբի այնպիսի կարողություններ, որոնց օգնությամբ հնարավոր կլինի կյանքի կոչել հաջորդող ծրագրերի նախագծումը, իրականացումը, արբանյակի կառավարումը, տվյալների ստացումն ու մշակումը:
«Սահմանվել են նոր՝ «Արմսաթ-2» արբանյակի տեխնիկական և տեխնոլոգիական պահանջները, և ակտիվ համագործակցություն է իրականացվում ճանաչված միջազգային կազմակերպությունների հետ՝ «Արմսաթ-2»-ի հանձնառությունը կյանքի կոչելու համար»,– ասվում է հաղորդագրությունում։
Հիշեցնենք, որ «Urdaneta» արբանյակը Հայաստանի համար պատրաստել է իսպանական «Satlantis» ընկերությունը։ Գործարկումը տեղի է ունեցել 2022-ի մայիսի վերջին, որից հետո այն վերանվանվել է «Արմսաթ 1»։
2024–ին արբանյակի ծրագրի վերաբերյալ քրեական վարույթ էր նախաձեռնվել։ Sputnik Արմենիայի տեղեկություններով` գործը քննվում էր Հակակոռուցպիոն կոմիտեում։ Քրեական վարույթն առնչվում էր ԲՏԱ նախարարության կողմից արբանյակի ծրագրում հնարավոր չարաշահումներին։
Ավելի ուշ նախարարը լրագրողների հետ զրույցում հայտարարեց, որ «Արմսաթ-1» արբանյակի վերաբերյալ որևէ աղմկահարույց տեղեկության չի տիրապետում։ Իսկ հետո հրապարակեց տիեզերքից արված լուսանկարները` որպես արբանյակի աշխատանքի ապացույց։