ԵՐԵՎԱՆ, 29 հոկտեմբերի – Sputnik. Հայաստանի դատական համակարգը քաղաքականացված է, և դատավճիռներն էլ կախված են մի անձի կամքից։ Այսօր Հակակոռուպցիոն դատարանի մոտ լրագրողների հետ զրույցում ասաց ՀՀ երրորդ նախագահ Սերժ Սարգսյանը՝ անդրադառնալով Մասիսի համայնքապետ Դավիթ Համբարձումյանի կալանավորմանը։
Երեկ երեկոյան Համբարձումյանը Հայաստան ժամանելուն պես կալանավորվեց։
«Ակնհայտ է, որ ամբողջ դատավարության ընթացքում որևէ լուրջ ապացույց չի ներկայացվել՝ կապված Դավիթի կողմից հանցավոր գործունեության հետ, բացի դրանից, այդ հոդվածով աննախադեպ ժամկետ է կիրառվել։ Բնականաբար, այդ ժամկետը կիրառվել է, որպեսզի որևէ կերպ համաներումը չազդի պատժամիջոցի վրա»,- ասաց Սերժ Սարգսյանը։
Ինչ վերաբերում է արևմտյան և միջազգային կառույցների լռությանը, ՀՀ երրորդ նախագահն ընդգծեց՝ նրանք չեն արձագանքում Հայաստանում տեղի ունեցող գործընթացներին, քանի որ սատարում են գործող իշխանություններին։
«Ոչ թե սկզբունքներով, այլ շահով են շարժվում»,- ասաց Սարգսյանը։
Նա հավելեց՝ իր նախագահության օրոք, երբ շփվում էր արևմտյան կառույցների հետ, ամեն դեպքում սա չէր նրանց պատկերացրած ժողովրդավարությունը։
Հիշեցնենք, որ Սերժ Սարգսյանի վերաբերյալ երկու գործերի քննությունը մեկ վարույթով է իրականացվում։ Ըստ մեղադրանքի՝ Սերժ Սարգսյանը, 2000 թվականի մայիսի 20-ից մինչև 2007-ի ապրիլի 4-ն ընկած ժամանակահատվածում զբաղեցնելով ՀՀ պաշտպանության նախարարի պաշտոնը` առնչություն է ունեցել նախարարության հաշվեկշռում գտնվող և ի պաշտոնե իրեն վստահված Իսակովի պողոտային և «Եռաբլուր» զինվորական պանթեոնին հարակից հողատարածքների ապօրինի օտարմանը։
Քրեական վարույթով Սերժ Սարգսյանին մեղադրանք է ներկայացվել խոշոր չափի հափշտակության (18 դրվագ), խոշոր չափի փողերի լվացման (2 դրվագ), դրան օժանդակելու (3 դրվագ) համար։