ԵՐԵՎԱՆ, 8 հոկտեմբերի – Sputnik. Միջազգային քրեական դատարանի (ՄՔԴ) առաջին դատախազ Լուիս Մորենո Օկամպոն ՄԱԿ-ի աշխատանքային խմբին կոչ է արել անվավեր ճանաչել Ադրբեջանի կողմից կալանավորված հայ բարերար, Արցախի նախկին պետնախարար Ռուբեն Վարդանյանի վերաբերյալ կարծիքը: Օկամպոն իր մասնագիտական կարծիքում նշել է, որ կա շահերի բախում և զեկույցն օբյեկտիվ չի կարող համարվել։
ՄԱԿ-ի` անձանց կամայական կալանավորման հարցերով աշխատանքային խումբը (WGAD) եզրակացրել է, որ Ռուբեն Վարդանյանի կալանավորումն Ադրբեջանի կողմից կամայական չի եղել։ Ավելին` անհիմն է համարել հայկական կողմի պնդումները, թե Ռուբեն Վարդանյանը ձերբակալվել է իր իրավունքները պաշտպանելու համար։
«Ուկրաինացի իրավաբան Գաննա Յուդկիվսկան (WGAD-ի ներկայիս նախագահող) պետք է ինքնաբացարկ հայտներ Ադրբեջանի դեմ ՄԱԿ-ի աշխատանքային խումբ բերված բոլոր գործերից։ Կա շահերի բախում, քանի որ նա «Equity Law Firm» իրավաբանական ընկերության ակտիվ գործընկերն է, իսկ այդ ընկերությունը տարիներ շարունակ ծառայություններ է տրամադրել Ադրբեջանի պետական նավթային ընկերությանը (SOCAR)։ Սա հաստատում է ուղղակի ֆինանսական կապը նրա և Ադրբեջանի կառավարության միջև»,– գրել է Օկապոն։
ՄՔԴ առաջին դատախազը հավելել է, որ Յուդկիվսկայի ամուսինը սերտ կապ ունի Ադրբեջանի իշխանությունների հետ, ինչպես նաև մեղադրվում է կոռուպցիայի մեջ։
«Կան հիմնավոր կասկածներ Գաննա Յուդկիվսկայի և Ադրբեջանի միջև։ Խախտում է Կամայական ձերբակալությունների հարցերով աշխատանքային խմբի աշխատանքային մեթոդների 5-րդ կետը, ինչպես նաև ՄԱԿ-ի Մարդու իրավունքների խորհրդի հատուկ ընթացակարգերի մանդատակիրների վարքագծի կանոնագրքի 2-րդ, 3-րդ, 5-րդ, 12-րդ և 15-րդ հոդվածները, և պաշտոնատար անձանց կարգավիճակը, հիմնական իրավունքները և պարտականությունները կարգավորող կանոնները »,– նշել է Օկամպոն։
Նրա խոսքով` ուսումնասիրված բոլոր փաստաթղթերը հստակ սահմանում են, որ մանդատակիրները պետք է գործեն անկախ, անաչառ և զերծ արտաքին ազդեցություններից, և պահանջում են, որ նրանք ինքնաբացարկ հայտնեն, երբ կարող է առաջանալ շահերի բախում։
Հիշեցնենք` Ռուբեն Վարդանյանն Արցախ տեղափոխվեց 2022 թվականի սեպտեմբերի 1-ին, պետնախարար նշանակվեց 2022 թվականի նոյեմբերի 4-ին և պաշտոնից ազատվեց 2023-ի փետրվարի 23-ին։ Սեպտեմբերի 27-ին նա ապօրինաբար ձերբակալվեց և մինչ օրս գտնվում է Բաքվի բանտում։
Հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:
Նախկին պետնախարար և բարերար Ռուբեն Վարդանյանի գործը քննվում է առանձին վարույթով: