ԵՐԵՎԱՆ, 25 սեպտեմբերի - Sputnik. Վրաստանի ՆԳՆ աշխատակիցները վնասազերծել են զինված տղամարդուն, որը պատանդ է վերցրել Թբիլիսիի «Holiday Inn» հյուրանոցում: Այս մասին հայտնում է գերատեսչությունը։
Ոստիկանության տվյալներով՝ այսօր ցերեկը «112» արտակարգ ծառայությունը ահազանգ է ստացել հյուրանոցի համարներից մեկում հնչած կրակոցի մասին: Դեպքի վայր են ժամանել ոստիկանության ստորաբաժանումները։
Պարզվել է, որ տղամարդը, փակվելով համարում, սպառնացել է հյուրանոցի աշխատակցին։ Ուժայիններին հաջողվել է վնասազերծել նրան։
Փաստի առթիվ հարուցվել է քրեական գործ՝ ապօրինի կերպով հրազեն ձեռք բերելու, պահելու և շրջանառելու, ինչպես նաև սպառնալիքի հոդվածներով: