ԵՐԵՎԱՆ, 22 սեպտեմբերի – Sputnik. Հայաստանի պաշտպանության նախարարությունը մշտական հիմունքներով մասնագիտացված խորհրդատվական օժանդակություն է ստանում Ֆրանսիայից և ԱՄՆ-ից։ Այսօր ՆԱՏՕ-ի խորհրդարանական վեհաժողովի 108-րդ «Ռոուզ-Ռոթ» սեմինարի ժամանակ այս մասին ասաց ՀՀ պաշտպանության նախարար Սուրեն Պապիկյանը։ Ըստ Պապիկյանի՝ մի շարք ուղղություններով ՀՀ ԶՈւ-ին համակարգված օժանդակություն է ցուցաբերում նաև Հունաստանը։
«Այս փուլում այդ ուղղության առաջնային ջանքերը կենտրոնացվել են նոր մոդելով և չափորոշիչներով ռազմավարական փաստաթղթերի մշակման, Զինված ուժերի կառուցվածքի և կառավարման համակարգի արդիականացման, կրթական և ուսումնավարժական կարողությունների զարգացման և այլ ուղղությունների վրա», – ասաց Պապիկյանը։
ՀՀ պաշտպանության նախարարի խոսքով՝ մեծ ներդրումներ են իրականացվում նաև ՀՀ ԶՈւ-ն արդիական սպառազինությամբ և ռազմական տեխնիկայով համալրելու ուղղությամբ։ Ըստ նրա՝ դա հնարավոր է դարձել ձեռքբերումների շուկաները դիվերսիֆիկացնելու ուղղությամբ ՀՀ կառավարության քաղաքականության արդյունքում։
«ԶՈւ-ի կերպափոխումը և ժամանակակից չափորոշիչների ներդրումն իրականացվում են ոչ միայն արդիական զինված ուժեր ունենալու, այլև գործընկեր երկրների զինված ուժերի հետ փոխգործակցության մակարդակի հասնելու նպատակով»,– շարունակեց Պապիկյանը։
Հիշեցնենք, որ Երևանում անցկացվում է «Հայաստանն ու Հարավային Կովկասը փոփոխվող աշխարհում․ ամրապնդելով ժողովրդավարությունն ու տարածաշրջանային անվտանգությունը» թեմայով ՆԱՏՕ-ի խորհրդարանական վեհաժողովի 108-րդ Ռոուզ-Ռոթ սեմինարը, որին մասնակցում են նաև Ադրբեջանի և Թուրքիայի ներկայացուցիչներ։