ԵՐԵՎԱՆ, 12 սեպտեմբերի - Sputnik. Ռուսաստանը Հայաստանից և Ադրբեջանից գործուն քայլեր է ակնկալում «3+3» ձևաչափով հերթական հանդիպման անցկացման վայրի և ժամկետների շուտափույթ համաձայնեցման ուղղությամբ: Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Ավելի վաղ ՌԴ ԱԳ նախարար Սերգեյ Լավրովը հայաստանցի գործընկեր Արարատ Միրզոյանի հետ համատեղ մամուլի ասուլիսում հայտարարել էր, որ Հարավային Կովկասի հարցով «3+3» ձևաչափի երրորդ նախարարական հանդիպումը նախապատրաստման փուլում է, իսկ Մոսկվան հանդես է գալիս հաջորդ երկու հանդիպումները Երևանում և Բաքվում կայանալու օգտին:
Զախարովան նշել է, որ Մոսկվան հաստատում է գործընկերներին բոլոր ուղղություններով աջակցություն ցուցաբերելու պատրաստակամությունը:
«Սա լավ հարթակ է հայ-ադրբեջանական կարգավորման հարցերի և Հարավային Կովկասի համար այլ արդիական թեմաների քննարկման համար», – ասել է նա:
ՌԴ ԱԳՆ պաշտոնական ներկայացուցիչը նաև նշել է Հարավային Կովկասում խաղաղության ամրապնդման հարցում Ռուսաստանի առաջնահերթությունները և նշել, որ Մոսկվան հետևողականորեն հանդես է գալիս այն բանի օգտին, որ Հայաստանի և Ադրբեջանի միջև այդ հաշտեցումը կայուն բնույթ կրի:
Մարիա Զախարովան նաև ընդգծել է Ռուսաստանի դերը Հայաստանի և Ադրբեջանի միջև խաղաղության հաստատման գործում:
Հիշեցնենք, որ Ռուսաստանն ակտիվորեն աջակցել է «3+3» ձևաչափի ստեղծմանը (Հայաստանը, Ադրբեջանը, Վրաստանը՝ մի կողմից, Ռուսաստանը, Իրանը և Թուրքիան՝ մյուս կողմից)։ Վրաստանն առայժմ չի մասնակցում նիստերին, սակայն մյուս անդամները բազմիցս հայտարարել են, որ Թբիլիսիի համար դուռը բաց է մնում: