ԵՐԵՎԱՆ, 14 օգոստոսի – Sputnik. Գործարար, բարերար Սամվել Կարապետյանի նկատմամբ իրականացվող քայլերն անհագստացնող են։ Այս մասին այսօր ասաց ՀՀ նախկին վարչապետ Հովիկ Աբրահամյանը ՀՀ հակակոռուպցիոն դատարանում իր գործով առաջին դատական նիստից հետո։
Լրագրողներից մեկի դիտարկմանը, թե Սամվել Կարապետյանի խափանման միջոցի մասին դատական որևէ նիստի կամ ակցիայի նա ներկա չի եղել, Աբրահամյանն արձագանեց.
«Դուք գիտեք` ինչի համար չեմ եղել, քանի որ ես վարչական կալանքի տակ եմ եղել։ Իսկ ընդհանրապես, նրա նկատմամբ իրականացվող քայլերն ինձ անհագստացնում են, և յուրաքանչյուր անարդար որոշում պատժվելու է»։
Ինչ վերաբերում է եկեղեցու նկատմամբ հարձակումներին, ապա Աբրահամյանը նշեց, որ այդ հարցը ինչպես բոլորին, իրեն ևս անհանգստացնում է։
Հիշեցնենք` Սամվել Կարապետյանի տանը հունիսի 17-ին խուզարկություն իրականացվեց այն բանից հետո, երբ նա հրապարակավ աջակցություն հայտնեց Հայ առաքելական եկեղեցուն՝ ընդգծելով, որ մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա:
Նրա հայտարարությունից հետո ՀՀ վարչապետ Նիկոլ Փաշինյանը գործարարին ուղղված վիրավորական և սպառնալի գրառումներ արեց սոցցանցերում։
Ավելի ուշ ՔԿ–ն հայտնեց, որ 422-րդ հոդվածի 2-րդ մասով նախաձեռնվել է քրեական վարույթ այն կապակցությամբ, որ Սամվել Կարապետյանը զանգվածային լրատվության միջոցով հարցազրույց տալու ընթացքում հնչեցրել է իշխանությունը զավթելուն՝ ՀՀ սահմանադրությամբ չնախատեսված եղանակով ՀՀ կառավարության լիազորություններին տիրանալուն ուղղված հրապարակային կոչ:
Հունիսի 18-ին Սամվել Կարապետյանը 2 ամսով կալանավորվեց։ Այժմ նա «Երևան–Կենտրոն» ՔԿՀ–ում է։
Հուլիսի 4–ին գործարարը մեկուսարանից ուղերձ հղեց` հայտնելով նոր քաղաքական ուժ ձևավորելու մասին։