«Արբատ» գումարտակի ղեկավար Արմեն Սարգսյանին մահապարտ է սպանել. ՌԴ ԱԴԾ

Այս տարվա փետրվարին Մոսկվայում տեղի ունեցած ահաբեկչական հարձակումը, որի հետևանքով սպանվել էր «Արբատ» կամավորական գումարտակի ղեկավար Արմեն Սարգսյանն, իրականացրել է մահապարտ-ահաբեկիչը, հայտարարել է ՌԴ ԱԴԾ-ի աշխատակիցը։

Նրա խոսքով՝ Ուկրաինայի հատուկ ծառայությունները 2025 թվականի սկզբից ի վեր ավելի հաճախ են դիվերսիա իրականացնում, որի ժամանակ կատարողին վերացնում են թիրախի հետ միասին։

Հիշեցնենք` փետրվարի 3–ին Մոսկվայի հյուսիս-արևմուտքում գտնվող «Ալ առագաստներ» բնակելի համալիրի 29-հարկանի շենքում պայթյուն էր տեղի ունեցել։ Պայթյունից անմիջապես հետո հայտնի դարձավ, որ 1 մարդ մահացել է, 4-ը` տարբեր աստիճանի վնասվածքներ ստացել, նրանց թվում է ԴԺՀ-ում կամավորական գումարտակի հիմնադիր Արմեն Սարգսյանը: Ավելի ուշ լրատվամիջոցները հայտնեցին, որ նա մահացել է հիվանդանոցում։

Քրեական գործ է հարուցվել վտանգավոր եղանակով սպանության, երկու և ավելի անձանց սպանության փորձի և զենքի ապօրինի շրջանառության հոդվածներով:

46-ամյա Արմեն Սարգսյանը հայտնի է նաև որպես Արմեն Գորլովսկի, Գորլովկայում (ԴԺՀ) զբաղվել է մարտիկների պատրաստմամբ:

RT-ի աղբյուրը հայտնել է, որ պայթյունի վայրում հայտնաբերվել է ենթադրյալ պայթեցնողի մարմինը: Նախնական զննության ընթացքում մասնագետները պարզել են, որ տղամարդը մոտ 45 տարեկան է, ունի կարճ մուգ մազեր, ճաղատություն, շագանակագույն աչքեր և արտահայտված քիթ, ձախ սրունքի վրա կա գունաթափված դաջվածք՝ թրի տեսքով։

Իսկզբանե երկու վարկած էր դիտարկվում։ Առաջինի համաձայն՝ պայթյունը կարող էին կազմակերպել Սարգսյանի բիզնես-մրցակիցները։ Արմեն Սարգսյանն արտասահմանից ծխախոտի խոշորագույն մատակարարներից մեկն էր։ Երկրորդ վարկածի համաձայն՝ Սարգսյանի սպանության հետևում կարող է կանգնած լինել Ուկրաինայի հետախուզության գլխավոր վարչությունը, քանի որ նրա «Արբատ» գումարտակը 2023 թվականին միացել էր ՌԴ Պն–ին և մասնակցում է հատուկ ռազմական գործողություններին։

Հայկական «Արբատ» գումարտակը գործում է 2014 թվականից, երբ սկսեց պաշտպանել Դոնբասը «Պյատնաշկա» բրիգադի կազմում։