ԵՐԵՎԱՆ, 25 հուլիսի – Sputnik. Միայն վերջին 2 օրում վրացական Գեզի մաքսային տերմինալից դեպի Վերին Լարս ճանապարհ ընկել շշալցված կոնյակով բեռնված 88 բեռնատար։ Այդ մասին «Ֆեյսբուքի» իր էջում գրել է ՀՀ էկոնոմիկայի նախարար Գևորգ Պապոյանը։
Ավելի վաղ հայտնել էինք, որ կոնյակ արտադրողները մայիսի 13-ին բողոքի ակցիա էին կազմակերպել ՀՀ–ում Վրաստանի դեսպանատան դիմաց` դժգոհելով, որ վրացական կողմը խոչընդոտներ է ստեղծում Հայաստանից Ռուսաստան բեռնատարների անցման համար։ Գևորգ Պապոյանը հարցը լուծելու համար մեկնել էր Թբիլիսի։ Վերադառնալով` նա պարբերաբար հրապարակում է, թե որ ժամանակահատվածում որքան բեռնատար է անցել վրացական սահմանը։
Նախարար Պապոյանն այսօր նաև ծիրանի արտահանման վերաբերյալ թվեր է ներկայացրել։
«Հունիսի 1–ից հուլիսի 24–ը ՌԴ տարածք է մտել 2 240 ծիրանով բեռնված բեռնատար։ Եվս 35–ը ճանապարհին են»,– գրել է նախարարը։
Հուլիսի 14–ին էլ Պապոյանը նշել էր, որ հունիսի 1-ից հուլիսի 13-ը ՌԴ է մտել հայկական ծիրանով բարձված 1775 բեռնատար։
Հիշեցնենք` ԶԼՄ–ներն ավելի վաղ գրել էին, որ ծիրան տեղափոխողները դժվարությունների են բախվել Լարսի անցակետում։ Ավելի ուշ հայտնի դարձավ, որ ծիրանով բեռնված որոշ բեռնատարներ Վերին Լարսի անցակետից հետ են ուղարկվել փաստաթղթային խնդիրների պատճառով։
Այս և արտահանման հետ կապված մի շարք խնդիրների լուծման համար Գևորգ Պապոյանը ՀՀ ՊԵԿ նախագահ Էդուարդ Հակոբյանի հետ հունիսի 23–ին մեկնել էր Վրաստան։