Սիրիայի Աս Սուվեյդա նահանգում շարունակվում են բախումները դրուզների և զինված խմբավորումների միջև, չնայած Սիրիայի իշխանությունների կողմից հրադադարի մասին պաշտոնական հայտարարությանը։
Ավելի վաղ Սիրիայի անցումային նախագահ Ահմեդ ալ Շարաան հայտարարել էր երկրում լիակատար հրադադարի մասին: Իշխանությունները զգուշացրել էին, որ հրադադարի չպահպանումը կհամարվի երկրի ինքնիշխանության խախտում և կբերի իրավական միջոցների:
Դատելով ստացվող տեղեկություններից՝ երկրի հարավում իրավիճակը շարունակում է մնալ չափազանց լարված։
Ինչպես հաղորդում են լրատվամիջոցները, մարտեր են ընթանում ինչպես գյուղական վայրերում, այնպես էլ Սուվեյդա քաղաքում: Երկու կողմերից էլ կան զոհեր և վիրավորներ: Զինյալները սպանում են ոչ միայն դրուզ աշխարհազորայիններին, այլև խաղաղ բնակիչներին, գերի են վերցնում խաղաղ բնակիչներին, այդ թվում՝ դեռահասների և տարեցների: Գրանցվել են դրուզների գույքի թալանման և ոչնչացման բազմաթիվ դեպքեր:
Սոցիալական ցանցերում տարածվում են տեսանյութեր, որտեղ ցուցադրվում են դրուզների դեմ դաժան մահապատիժների և հաշվեհարդարների տեսարաններ։
Հիշեցնենք` հուլիսի 13-ին հայտնի դարձավ, որ զինված խմբավորումները հարձակվել են Սուվեյդա նահանգի մի շարք բնակավայրերի վրա, որտեղ հիմնականում դրուզներ են ապրում։ Խաղաղ բնակչությանը պաշտպանելու համար կռվի դուրս եկան դրուզների ինքնապաշտպանական ջոկատները (Իսրայելի կառավարության աջակցությամբ)։ Սիրիայի պաշտպանության նախարարության տվյալներով՝ բախումների ժամանակ ավելի քան 30 մարդ է սպանվել, ավելի քան 100-ը` վիրավորվել։
Դրուզներին աջակցելու նպատակով Իսրայելի պաշտպանության բանակը հուլիսի 16-ին հարված հասցրեց Դամասկոսում Սիրիայի գլխավոր շտաբի տարածքին: Սիրիայի հետ սրման ֆոնին Իսրայելի բանակը նաև հայտարարեց Գոլանի բարձունքներ երկու դիվիզիա տեղափոխելու պատրաստակամության մասին:
Հուլիսի 19-ին Թուրքիայում ԱՄՆ դեսպան և Սիրիայի հարցերով ԱՄՆ հատուկ բանագնաց Թոմ Բարաքը հայտարարեց, որ Իսրայելի վարչապետ Բենիամին Նեթանյահուն և Սիրիայի ժամանակավոր նախագահ Ահմեդ ալ Շարաան համաձայնության են եկել հրադադարի շուրջ։