ԵՐԵՎԱՆ, 18 հուլիսի – Sputnik. Արցախի պետական նախարար Նժդեհ Իսկանդարյանը հրավիրվել է ՀՀ քննչական կոմիտե։ Տեղեկությունը հայտնում է Արցախցիների իրավունքների պաշտպանության խորհուրդը։
«Նպատակ է դրվել վերաբացել մի քրեական գործ, որը նախկինում արդեն փակվել էր։ Մեր համոզմամբ՝ այս գործընթացն ակնհայտորեն կրում է անձնական ու քաղաքական հետապնդման բնույթ և ուղղակիորեն պայմանավորված է հուլիսի 12-ի հանրահավաքին պետնախարարի ակտիվ ներգրավվածությամբ։ Պարոն Իսկանդարյանն այն եզակի պաշտոնյաներից է, որը ոչ միայն ներկա էր հանրահավաքին, այլև իր աջակցությունն ու ակտիվ մասնակցությունն է շարունակաբար ցուցաբերել նաև դրան նախորդած ու հաջորդած բոլոր գործընթացներին։ Այս ամբողջ ընթացքում նա իրականացրել է ակտիվ հանրային գործունեություն»,– ասված է հայտարարության մեջ։
Խորհուրդը Իսկանդարյանին ՔԿ կանչելը քաղաքական հետապնդում է որակել` ընդգծելով, որ սա հարված է ոչ միայն մեկ պաշտոնյայի, այլև Արցախի պետական ինստիտուտների ու Արցախցիների իրավունքների պաշտպանության խորհրդի հեղինակությանն ու կենսունակությանը։
Հիշեցնենք` արցախցիները հուլիսի 12-ին հանրահավաք էին կազմակերպել Երևանում` պահանջելով լուծել իրենց սոցիալական խնդիրները։ Հանրահավաքից հետո ոստիկանները թույլ չտվեցին, որ նրանք երթ իրականացնեն` հայտարարելով, որ ուժ կկիրառեն։ Արցախցիներն էլ ի նշան բողոքի նստացույց սկսեցին Ազատության հրապարակում։
Արցախցիների իրավունքների պաշտպանության խորհրդի անդամ Ապրես Մարգարյանը հուլիսի 14-ին հայտարարեց, որ բռնի տեղահանվածները ժամանակավորապես կդադարեցնեն փողոցային ակցիաները, քանի որ անհրաժեշտ հանրային աջակցություն չկա։ Նա նշեց, որ կքննարկեն հետագա քայլերը և դրանց մասին կտեղեկացնեն ավելի ուշ:
Հուլիսի 16-ին հայտնի դարձավ, որ դատախազությունը պահանջում է անվավեր ճանաչել Արցախի մշտական ներկայացուցչության շենքի նկատմամբ սեփականության իրավունքը։ Նույն օրը ՀՀ վարչապետ Նիկոլ Փաշինյանը հայտարարեց՝ Արցախի մշտական ներկայացուցչության շենքը գույք է, որը պետք է պատկանի Հայաստանի Հանրապետությանը։ Նա ընդգծեց` թույլ չի տա, որ ՀՀ-ի մեջ երկրորդ պետություն լինի։