ԵՐԵՎԱՆ, 30 հունիսի – Sputnik. ՀԷՑ գլխավոր տնօրենի ժամանակավոր պաշտոնակատար Դավիթ Ղազինյանն այսօր հրավիրված ասուլիսում կառավարության ներկայացրած ՀԷՑ–ի պետականացմանը վերաբերող նախագիծը որակեց «անգրագետ»` ուղղելով նախկինում արած իր սխալը։
«Մի հարցազրույցում սխալվել, նշել եմ «կիսագրագետ օրենքի նախագիծ»։ Հիմա սխալս ուղղեմ` լինելով իրավաբան` համարում եմ «անգրագետ օրենքի նախագիծ»։ Չգիտեմ` ինչքանով կվիրավորվեն, չեն վիրավորվի... Անգամ պատրաստ եմ հիմնավորել` որ ձևաչափով ցանկանան»,– ասաց Ղազինյանը։
Զարգացող պետության մեջ նման ծավալի ներդրում իրականացնող ընկերությունը պետականացնելու, խլելու գործելաոճը ընկերության տնօրենի պաշտոնակատարը նորմալ չի համարում` հավելելով, որ մինչ այդ իրենց հետ կառավարությունն իր դժգոհությունը ներկայացնելու նույնիսկ փորձ չի արել։
«Խնդիրը հենց այստեղ է` ինչո՞ւ չեն այս մարդիկ` մեր իշխանությունները, ցանկանում դա քննարկել։ իմ անձնական կարծիքն ասեմ` վախենում են, որ այդ քննարկումների արդյունքում իրենք սխալ դուրս կգան։ Պետականացման մասին անգամ մտածելը, պիտի ասեմ` այստեղ խելագարության կանխավարկածի խնդիր կա»,– ասաց Ղազինյանը։
Ստեղծված պարագայում ընկերության հնարավոր քայլերի մասին հարցին ժամանակավոր պաշտոնակատարը պատասխանեց` քանի որ ընկերության սեփականատերը, անկախ ստեղծված վիճակից, պետականամետ մարդ է, ՀԷՑ–ը պայքարելու է բացառապես իրավական և պետական բոլոր հնարավոր ճանապարհներով։ Ներպետական հնարավորություսնները սպառելուց հետո դիմելու են արդեն միջազգային ատյաններին։
«Շատ վատ արձագանքներ ենք ստանում մեր միջազգային գործընկերներից»,– ասաց Ղազինյանը` չբացահայտելով մանրամասներ։
Հիշեցնենք` ՀՀ վարչապետ Նիկոլ Փաշինյանը հունիսի 18–ին` գործարար, ՀԷՑ–ի սեփականատեր Սամվել Կարապետյանի կալանավորումից ժամեր առաջ, հայտարարեց` հասունացել է պահը, երբ «Հայաստանի էլեկտրական ցանցեր» ՓԲԸ–ն պետք է ազգայնացվի (պետականացվի)։ Փաշինյանը նաև սպառնաց ազատել ՀԷՑ-ի՝ պետության հետ չհամագործակցող աշխատակիցներին։ Հունիսի 24-ին նա հայտարարեց, որ ՀԷՑ–ի պետականացման պլանը պատրաստ է։