ԵՐԵՎԱՆ, 25 հունիսի – Sputnik. Անընդունելի է սպառնալիքներով հանդես գալ մի ընկերության հասցեին, որի գործունեությունը փոխկապակցված է ՀՀ–ի բիզնեսի գրեթե բոլոր ոլորտների հետ։ Այս մասին հայտարարություն է տարածել «ՓՄՁ համագործակցության ասոցիացիան»` անդրադառնալով ՀԷՑ–ը պետականացնելու մասին հայտարարություններին։
«Մեծ ու փոքր բիզնեսի ներկայացուցիչների և նրանց հետ փոխկապակցված անձանց հասցեին հնչող անպատեհ ու անզուսպ հայտարարությունները բացասական ազդեցություն են ունենում և կարող են առաջիկայում լրջագույն հետևանքներ ունենալ երկրի բիզնես միջավայրի, ներդրումային գրավչության, տնտեսական հեղինակության և միջազգային վարկանիշների վրա»,– ասված է հաղորդագրությունում։
Ըստ ասոցիացիայի` չնայած նրան, որ ՀԷՑ–ի գործունեության արդյունքում ասոցիացիայի շահառու ՓՄՁ-ներ ևս ունեցել են խնդիրներ, բայց իրենք ուղիղ ոչ մի կապ չունեն ընկերության հետ։
«Կարևորելով ընկերության գործունեության թափանցիկությունն ու օրինականությունը` մենք միևնույն ժամանակ ընդգծում ենք, որ որևէ փոխկապակցված անձի շուրջ ծագած խնդիրը չպետք է տարածվի ամբողջ ընկերության վրա՝ հաշվի առնելով ընկերության դերակատարումը տնտեսության մեջ»,– ասված է հաղորդագրությունում։։
«ՓՄՁ համագործակցության ասոցիացիան» հատկապես անթույլատրելի է համարում հանրային ծառայություններ մատուցող կազմակերպությունների նկատմամբ նման հրապարակային ճնշման և անմեղության կանխավարկածը խախտող արտահայտությունների կիրառումը` նշելով, որ նման մոտեցումները կարող են սասանել ներդրողների վստահությունը և խաթարել տնտեսական կայունությունը։
Հիշեցնենք` ՀԷՑ–ի սեփականատեր, «Տաշիր» ընկերությունների խմբի ղեկավար Սամվել Կարապետյանի տանը հունիսի 17-ին խուզարկություն իրականացվեց այն բանից հետո, երբ նա հրապարակավ աջակցություն հայտնեց Հայ առաքելական եկեղեցուն՝ ընդգծելով, որ մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա:
Նրա հայտարարությունից հետո ՀՀ վարչապետ Նիկոլ Փաշինյանը գործարարին ուղղված վիրավորական և սպառնալի գրառումներ արեց սոցցանցերում։
Ավելի ուշ ՔԿ–ն հայտնեց, որ 422-րդ հոդվածի 2-րդ մասով նախաձեռնվել է քրեական վարույթ այն կապակցությամբ, որ Սամվել Կարապետյանը զանգվածային լրատվության միջոցով հարցազրույց տալու ընթացքում հնչեցրել է իշխանությունը զավթելուն՝ ՀՀ սահմանադրությամբ չնախատեսված եղանակով ՀՀ կառավարության լիազորություններին տիրանալուն ուղղված հրապարակային կոչ:
Հունիսի 18-ին Սամվել Կարապետյանը 2 ամսով կալանավորվեց։ Այժմ նա «Երևան–Կենտրոն» ՔԿՀ–ում է։