ԵՐԵՎԱՆ, 3 հունիսի – Sputnik․ Երևանում տրանսպորտի ուղեվարձի դեմ ակցիաների արդյունքում թերհավաքագրումներ են եղել, ինչի հետևանքով հնարավոր չէ գնել նախատեսված շարժակազմի մեծ մասը։ Այս մասին ասուլիսի ժամանակ հայտարարեց Երևանի քաղաքապետի մամուլի խոսնակ Հայկ Կոստանյանը։
«Արդյունքում ունենք իրավիճակ, որ նախատեսված 45 տրոլեյբուսից 30-ը հնարավոր չի լինի գնել, քանի որ թերհավաքագրումների պատճառով գումար չկա։ Եթե նման տեմպերով շարունակվեն հավաքագրումները, չի բացառվում, որ 15 տրոլեյբուս էլ հնարավոր չլինի ձեռք բերել»,- ասաց նա։
Կոստանյանը նշեց, որ քաղաքապետարանը չի պատրաստվում այլ ոլորտից, ասենք` հանրակրթությունից գումար կտրել ու ներդնել հասարակական տրանսպորտի ոլորտում։
Նրա խոսքով` ուղեվարձի բոյկոտի հետևանքով շարժակազմն ավելի ուշ ձեռք կբերվի։
Հավելենք, որ ուղեվարձը չվճարելու համար վարչական պատասխանատվություն ենթադրող օրինագիծն այժմ խորհրդարանում է։
Հիշեցնենք, որ հունվարի 1-ից ամբողջությամբ ուժի մեջ է մտել միասնական տոմսային համակարգը, իսկ փետրվարի 1-ից նոր սակագներ են գործում։ Ներդրվել է նաև ուղետոմսի նոր սակագին, որն արժե 150 դրամ և կգործի մինչև 2026 թվականի հունվարի 1-ը։