ԵՐԵՎԱՆ, 29 մայիսի – Sputnik․ Եթե «բանակից փողով ազատվելու» օրինագծի կարգավորումներում մտահոգող խնդիրները չլուծվեն, ապա Հայաստանի մարդու իրավունքների պաշտպան Անահիտ Մանասյանը չի բացառում Սահմանադրական դատարան դիմելը։ Այդ մասին նա ասաց այսօր կառավարության նիստից հետո լրագրողների հետ ճեպազրույցում։
«Այս պահին էլ հույս ունեմ, որ գործընկերները հաշվի կառնեն այն բոլոր դիտարկումները, որ ներկայացրել ենք և չենք ունենա այդ կարգավորումները»,- նշեց Մանասյանը։
Նա շեշտեց՝ անընդունելի է համարում սոցիալական ցանկացած շերտավորում մեր երկրում, որը կարող է այդ թվում կապված լինել Սահմանադրությամբ սահմանված պարտականությունների կատարման հետ։
«Չի կարելի` երկրում այնպիսի իրավակարգավորումներ և մեխանիզմներ լինեն, որոնք կարող են մարդկանց համար, առնվազն հանրային ընկալումների առումով, տպավորություն ձևավորել, թե որևէ պարտականության կատարման հետ կապված արտոնությունը կարող է պայմանավորված լինել անձի գույքային դրությամբ, այսինքն՝ գումար ունենալու կամ չունենալու հանգամանքով»,- նշեց Մանասյանը։
Հիշեցնենք, որ զինվորական ծառայության մասին փոփոխությունների նախագիծն առաջարկում է պարտադիր զինվորական ծառայություն անցնել ընդամենը 1 ամիս ու վճարել 24 միլիոն դրամ կամ պարտադիր զինվորական ծառայություն անցնել 4 ամիս և վճարել 18 միլիոն դրամ։ Մինչև 16 տարին լրանալը ՀՀ քաղաքացիությունից հրաժարվելու պետական տուրք սահմանել 15 միլիոն դրամ։ Պարտադիր զինվորական ծառայության անցնելու առավելագույն սահմանային տարիք կնախատեսվի 32 տարեկանը։ Այն առաջարկել է ՔՊ–ական պատգամավոր Հայկ Սարգսյանը։ Օրինագիծը մայիսի 22-ին ստացավ կառավարության դրական եզրակացությունը, այն առաջիկայում կներկայացվի արդեն Ազգային Ժողովի քննարկմանը։