ԵՐԵՎԱՆ, 29 ապրիլի – Sputnik. Մոսկվայի Խամովնիչեսկի դատարանը բավարարել է հումորիստ Եվգենի Պետրոսյանի հայցն ընդդեմ առաջին ամուսնությունից իր դստեր՝ Վիկտորինայի, որով նա խնդրել էր դստերը բնակարանն օգտագործելու իրավունքից զրկված ճանաչել և հանել գրանցումից։ Այս մասին դատարանի դահլիճից հաղորդում է ՌԻԱ Նովոստիի թղթակիցը։
«Հայցը բավարարել... Վիկտորինա Եվգենիևնա Պետրոսյանցին ճանաչել բնակելի տարածքն օգտագործելու իրավունքը կորցրած... այս որոշումը գրանցումից հանելու հիմք է», – դատավճիռը հրապարակեց դատավորը։
Հումորիստի ներկայացուցիչը դատարանին հայտնել է, որ դուստրը կապ չի պահպանում հոր հետ և ապրում է ԱՄՆ–ում։ Նա բացատրել է, որ, ըստ էության, Վիկտորինայի և Պետրոսյանի հարաբերությունները կոնֆլիկտային բնույթ են կրում, դա պայմանավորված է նրանով, որ Ստեպանենկոյից Պետրոսյանի ամուսնալուծության ժամանակ դուստրը աջակցել է մորը։
Պետրոսյանի հայցը դատարան է ներկայացվել անցյալ տարվա նոյեմբերին։
Ավելի վաղ պատասխանողի ներկայացուցիչը հիվանդության պատճառով չէր ներկայացել դատական նիստին, այդ կապակցությամբ դատարանը հետաձգել էր նիստը։ Սակայն Պետրոսյանի ներկայացուցիչը դեմ էր հետաձգմանը։ Նրա խոսքով՝ Վիկտորինան բնակարանում չի ապրել 2017 թվականից։ Բացի այդ, նա փաստաթղթեր է ներկայացրել այն մասին, որ հենց Եվգենի Պետրոսյանն է վճարել կոմունալ վարձերը։