ԵՐԵՎԱՆ, 18 ապրիլի – Sputnik. Արցախի նախագահ Սամվել Շահրամանյանը ՀՀ իշխանությունների կողմից ուղիղ ճնշումներ՝ ֆիզիկական կամ քրեական գործերի հարուցման սպառնալիք և այլն, չի զգում։ Այս մասին ասաց Շահրամանյանն այսօր լրագրողների հետ ճեպազրույցում։ Նրա խոսքով՝ եթե դա կարելի է ճնշում համարել, ապա դա զգում են ՀՀ իշխանությունների կողմից արցախցիների հետ հաշվի չնստելու համատեքստում։ Ըստ նրա՝ բռնի տեղահանությունից հետո ՀՀ իշխանության ներկայացուցիչների հետ որևէ առնչություն չի եղել։
«Եթե դուք սա համարում եք ճնշում, ուրեմն կա ճնշում։ Ես գտնում եմ, որ մեր հետ պետք է հաշվի նստել, բոլոր խնդիրները՝ սոցիալական, ունեն լուծումներ, և մենք պատրաստ ենք այդ լուծումների շրջանակներում նաև աջակցել ՀՀ կառավարությանը, և այսպիսի պահվածքը, որ մենք մեզ օտար ենք զգում, անընդունելի է»,- ասաց Շահրամանյանը։
Հիշեցնենք՝ 2024թ․ փետրվարի 22-ին հայտնի դարձավ, որ Արցախի նախագահ Սամվել Շահրամանյանը Հակակոռուպցիոն կոմիտեում վկայի կարգավիճակով հարցաքննվել է հարուցված քրեական գործի շրջանակներում:
Հունիսի 21-ին հայտնի դարձավ, որՀՀ ՆԳՆ ոստիկանության հատուկջոկատայինները կոտրել են ՀՀ–ում Արցախի ներկայացուցչության դարպասը, հատուկ տեխնիկայի միջոցով էլ այնտեղից տարել են Արցախի նախագահ Սամվել Շահրամանյանին սպասարկող մեքենան։ Մինչ այդ քննիչը կապարակնքել էր Արցախի նախագահի մեքենան։ Քննիչը լրագրողներին հայտնել էր, որ գործողություններն իրականացվում են քրեական վարույթի շրջանակներում։