ԵՐԵՎԱՆ, 17 ապրիլի – Sputnik. Արագածոտնի մարզի Շամիրամ գյուղի գերեզմանատանը կից սգո սրահում 4 անձի սպանած Թելման Քալաշյանը դատապարտվեց ցմահ ազատազրկման։ Sputnik Արմենիային այս մասին ասաց տուժողների փաստաբան Լուսինե Սահակյանը։
Վճիռը հրապարակել է Արագածոտնի ընդհանուր իրավասության դատարանը` դատավոր Սուրեն Մնոյանի նախագահությամբ։
«Մենք պահանջել էինք ցմահ ազատազրկում, դատարանը հենց այդ վճիռը կայացրեց։ Այժմ պետք է սպասենք մեղադրյալ կողմի պաշտպանների քայլերին, որոշումը գոհացնում է մեզ»,– նշեց Սահակյանը։
Հիշեցնենք` դեպքը տեղի է ունեցել 2017 թվականի օգոստոսի 1-ին։ Այդ օրը Թելման Քալաշյանը մտել էր սգո սրահ և «Սայգա» տիպի որսորդական հրացանով կրակ բացել հավաքվածների ուղղությամբ։ Հանցագործությունը կատարվել էր կենցաղային հողի վրա, սպանվել էր 4 մարդ, 3-ն էլ վիրավորվել էին։ Քալաշյանը հետախուզվում էր, և օգոստոսի լույս 25-ի գիշերն իրավապահները նրան հայտնաբերեցին Ջանֆիդա և Նալբանդյան գյուղերի միջնամասում։
Ըստ ՀՀ քննչական կոմիտեի` սպանության բուն պատճառը եղել է փողը։ 2013թ–ին Քալաշյանը տոկոսով 75 000 դոլար գումար է պարտք տվել ռուսաստանաբնակ համագյուղացի եղբայրներին։ Առաջին 2 տարվա ընթացքում Քալաշյանն անխափան ստացել է պարտքի տոկոսները, բայց 2015թ–ից եղբայրների բիզնես ծրագրերը խափանվել են, և նրանք չեն կարողացել վերադարձնել պարտքն ու կուտակված տոկոսները։
Թելման Քալաշյանը սկսել է սպառնալ ու պահանջել իրեն պարտք մնացած 100 000 դոլարը։ Իսկ երբ հույսը կտրել է, վերցրել է զենքն ու գնացել այնտեղ, ուր այդ օրն ամբողջ գյուղն էր հավաքվել։ Սպանվածների ու վիրավորների մեջ Քալաշյանի պարտապաններից ոչ ոք չի եղել։