ԵՐԵՎԱՆ, 25 մարտի – Sputnik. Ստամբուլի գլխավոր դատախազությունը պահանջել է կալանավորել Էքրեմ Իմամօղլուին աջակցող բողոքի ակցիաների ժամանակ ձերբակալված ավելի քան 200 ցուցարարի։ Այս մասին հայտնում են թուրքական լրատվամիջոցները։
«Ստամբուլում բերման ենթարկված 206 ցուցարարներ կալանքի միջնորդությամբ տեղափոխվել են միջազգային քրեական դատարանի հերթապահ բաժին»,- ասվում է հաղորդագրությունում։
Մարտի 24-ին Թուրքիայի ներքին գործերի նախարար Ալի Երլիքայան հայտարարեց, որ երկրում բողոքի ցույցերի ընթացքում ավելի քան 1130 քաղաքացի է բերման ենթարկվել։ Ոստիկանները առգրավել են կացիններ, մուրճեր, դանակներ, ծծմբաթթու։ Իսկ արդեն մարտի 25-ին նախարարը հայտնել է Ստամբուլում ավելի քան 40 մարդու կալանավորման մասին։
Հիշեցնենք` Թուրքիայի խոշոր քաղաքներում մարտի 19-ից զանգվածային բողոքի ակցիաներ են անցկացվում` ի պաշտպանություն Ստամբուլի քաղաքապետ Էքրեմ Իմամօղլուի։
Բողոքի ակցիաներն ակտիվացել են մարտի 23-ին, երբ հայտնի է դարձել, որ դատարանը կոռուպցիոն մեղադրանքով ձերբակալված Իմամօղլուին կալանավորելու որոշում է կայացրել։ Թուրքիայի ՆԳՆ-ի որոշմամբ՝ նա հեռացվել է Ստամբուլի քաղաքապետի պաշտոնից։
Երեկ կայացել է նաև Ժողովրդահանրապետական կուսակցության փրայմերիզը՝ ապագա նախագահական ընտրություններում միասնական թեկնածու ընտրելու համար: Կուսակցության ղեկավար Օզգյուր Օզելը հայտնել է, որ կուսակցության թեկնածու Իմամօղլուի օգտին քվեարկել է 14,8 մլն մարդ: Նա ընդգծել է` իրենց անցկացրած փրայմերիզը կասկածի տակ է դնում Թուրքիայի գործող նախագահ Ռեջեփ Թայիփ Էրդողանի լեգիտիմությունը, ուստի երկրում պետք է արտահերթ ընտրություններ անցկացվեն։
Հավելենք, որ Իմամօղլուն համարվում է Թուրքիայի գործող նախագահ Ռեջեփ Թայիփ Էրդողանի գլխավոր մրցակիցը։ Թուրքիայի սահմանադրությունը թույլ է տալիս նախագահի թեկնածու առաջադրվել միայն բարձրագույն կրթություն ունեցող անձանց, մինչդեռ Ստամբուլի համալսարանն ավելի վաղ չեղարկել էր Իմամօղլուի դիպլոմը։