Թուրքիայում ընդդիմության ցույցերի ընթացքում ձերբակալվել է ավելի քան 1 100 մարդ, տուժել է 123 ոստիկան։ Այս մասին հայտնել է ներքին գործերի նախարար Ալի Երլիքայան։
«Ցույցերի ընթացքում վիրավորվել է 123 ոստիկան։ Այդ գործողությունների ընթացքում առգրավվել են ծծմբաթթու, քարեր, փայտեր, ճայթուկներ, մուրճեր, կացիններ և դանակներ։ Շարունակվում են դատական գործողությունները ոստիկանության վրա հարձակվողների, հանրային գույքը վնասողների և ժողովրդի անվտանգությանն սպառնացողների նկատմամբ», - նշել է նախարարը։
Թուրքական ԶԼՄ-ների տվյալներով՝ մոտ 100 մարդ ձերբակալվել է միայն երեկ Ստամբուլում տեղի ունեցած ցույցերին։
Հանրահավաքից հետո ցուցարարների և անվտանգության ուժերի միջև տեղի են ունեցել բախումներ։ Ոստիկանությունը հավաքվածների դեմ կիրառել է արցունքաբեր գազ և ռետինե փամփուշտներ։
Որոշ ցուցարարների ինքնությունը պարզելուց հետո ոստիկանությունն առավոտյան սկսել է ձերբակալությունները։
Ստամբուլի քաղաքապետ Էքրեմ Իմամօղլուի կալանավորման մասին հայտնի է դարձել մարտի 23-ին։ Նա Թուրքիայի քաղաքացիներին կոչ է արել դուրս գալ զանգվածային ցույցերի։
Իմամօղլուն դիտարկվում է որպես հնարավոր արտահերթ նախագահական ընտրություններին մասնակցելու գլխավոր հավակնորդներից մեկը և Էրդողանի հիմնական մրցակիցը: Նա ձերբակալվել էր մարտի 19-ին կոռուպցիայի, կաշառակերության, կաշառակերության և ահաբեկչությանն օժանդակելու մեջ մեղադրվող կազմակերպության հետ կապերի գործով: Ինքը՝ քաղաքական գործիչը, հայտարարել է, որ չի պատրաստվում ենթարկվել իշխանությունների ճնշմանը։ Չնայած Թուրքիայի մի շարք շրջաններում մինչև շաբաթվա վերջ սահմանված՝ ցույցերի արգելքին, Իմամօղլուի կալանավորումը բողոքի նոր ալիք է բարձրացրել: