ԵՐԵՎԱՆ, 21 մարտի - Sputnik. Եկեղեցիների համաշխարհային խորհուրդը պահանջել է անհապաղ ազատ արձակել Ադրբեջանում պահվող հայ գերիներին։ Հայտարարությունն արվել է ՄԱԿ-ի Մարդու իրավունքների խորհրդի հերթական՝ 58-րդ նստաշրջանի ընթացքում:
«Եկեղեցիների համաշխարհային խորհուրդը խորին մտահոգություն է հայտնում Ադրբեջանի կողմից հայ քաղաքացիների անօրինական ձերբակալությունների կապակցությամբ։ Պատանդ վերցնելն ու պահելը խախտում են միջազգային մարդասիրական իրավունքի հիմնարար սկզբունքները՝ ներառյալ Ժնևի կոնվենցիաները, և մարդու իրավունքների լուրջ խախտում են», - ասվում է հայտարարության մեջ:
Հայտարարությամբ նշվում է նաև, որ 2020 թվականի նոյեմբերից մինչև 2023 թվականի հոկտեմբերը Ադրբեջանը ապօրինի կերպով պատանդառել է առնվազն 23 հայի, այդ թվում՝ քաղաքացիական անձանց, նախկին և գործող պաշտոնյաների ու զինծառայողների: Նրանցից շատերը ենթարկվել են խոշտանգումների և նվաստացնող վերաբերմունքի, ինչը փաստագրված է իրավապաշտպան կազմակերպությունների կողմից։
«Մենք հաստատում ենք, որ ապօրինի ձերբակալված բոլոր անձինք պետք է անհապաղ և անվերապահորեն ազատ արձակվեն։ Անձանց՝ պատշաճ իրավական ընթացակարգի և իրավական պաշտպանության խախտումներով երկարատև պահումը խաթարում է տարածաշրջանում կայուն խաղաղության և հաշտեցման հասնելու ջանքերը», - նշել են խորհրդում:
Կազմակերպությունը նաև կոչ է արել ՄԱԿ-ի Մարդու իրավունքների խորհրդին՝ ձեռնարկել բոլոր հնարավոր միջոցները այդ պատանդներին ազատ արձակելու համար, իսկ կողմերին՝ կատարել միջազգային իրավունքով իրենց իրավական պարտավորությունները՝ այդ անձանց մարդկային արժանապատվության պաշտպանության և արդարության ապահովման համար:
Եկեղեցիների համաշխարհային խորհուրդը համերաշխություն է հայտնել Հայ առաքելական եկեղեցուն և ժողովրդին, առանձնապես նրանց, ով առնչվում է այս իրավիճակին և վերահաստատել արդարությանն ու խաղաղությանն իր հանձնառությունը:
Ընդհանուր առմամբ, պաշտոնական տվյալներով՝ Բաքվի բանտերում 23 հայ գերի կա։ Նրանցից 15-ի, ներառյալ Արցախի ռազմաքաղաքական ղեկավարության ներկայացուցիչները նկատմամբ, այժմ ընթանում են ցուցադրական դատավարություններ։