ԵՐԵՎԱՆ, 19 մարտի - Sputnik. ՌԴ նախագահ Վլադիմիր Պուտինը և ԱՄՆ առաջնորդ Դոնալդ Թրամփը մարտի 18–ի հեռախոսազրույցից հետո աշխատում են Սև ծովում բոլոր տեսակի նավերի վրա հարձակումների համար մորատորիում սահմանելու ուղղությամբ։ Այս մասին «Bloomberg» գործակալությանը հայտնել է ԱՄՆ նախագահի հատուկ բանագնաց Սթիվեն Ուիտկոֆը։ Նրա խոսքերը մեջբերում է ՌԻԱ Նովոստին։
«Երկու նախագահների միջև պայմանավորվածություն է ձեռք բերվել, և դա արվել է նախագահ Թրամփի առաջարկով՝ երկու կողմից էներգետիկ և քաղաքացիական ենթակառուցվածքների վրա հարձակումները դադարեցնելու, ինչպես նաև հացահատիկ և այլ ապրանքներ տեղափոխող ռազմական և բեռնատար նավերի վրա հարձակումների համար մորատորիում սահմանելու վերաբերյալ: Վերջնարդյունքում դա պետք է հանգեցնի լիակատար հրադադարի, ինչը մի փոքր ավելի բարդ է»,-ասել է Ուիտկոֆը։
Հիշեցնենք` Պուտինն ու Թրամփը մարտի 18–ին հեռախոսազրույց են ունեցել։ Կրեմլի մամուլի ծառայության տեղեկատվության համաձայն՝ զրույցի ընթացքում երկու երկրների ղեկավարները քննարկել են ուկրաինական ռազմական հակամարտության կարգավորումը, ինչպես նաև փոխադարձ հետաքրքրություն են հայտնել հարաբերությունների կարգավորման հարցում՝ աշխարհում անվտանգության և կայունության ապահովման համար հատուկ պատասխանատվության համատեքստում:
Այսպես, Պուտինը ողջունել է Թրամփի առաջարկն այն մասին, որ Ուկրաինայում հակամարտության կողմերը 30 օրով փոխադարձաբար հրաժարվեն էներգետիկ ենթակառուցվածքի օբյեկտներին հարվածելուց և ՌԴ զինվորականներին այն իրականացնելու հրաման է տվել։ Զելենսկին նույնպես հայտարարել է, որ աջակցում է էներգետիկ օբյեկտներին հարվածներ հասցնելուց հրաժարվելուն։