ԵՐԵՎԱՆ, 5 մարտի – Sputnik. Այսօր հերթական անգամ տնտեսվարողները կառավարության շենքի դիմաց բողոքի ակցիա են անցկացնում։ Նրանք դժգոհ են շրջանառության հարկը 5 տոկոսից 10 տոկոս դարձնելու որոշումից:
«Պարոն Պապոյանը (ՀՀ էկոնոմիկայի նախարար Գևորգ Պապոյան,–խմբ.) մեզ խոստում տվեց, որ շուտ-շուտ հանդիպումներ կկազմակերպի, առաջարկներ կանեն, բայց դեռ դրական ոչ մի քայլ չենք տեսել, դրա համար նորից հավաքվել ենք ակցիայի։ Ասել էր՝ կքննարկենք, կլսենք ձեր առաջարկները, առաջ կքաշենք։ Բացի շրջանառության հարկը, գույքագրումն է խնդիրը, որը տեռոր է լինելու, մանր ու միջին բիզնեսի վրա հարձակում է լինելու»,–լրագրողներին ասաց ակցիայի մասնակից տիկին Կարինեն։
Անդրադառնալով ՀՀ իշխանությունների գործելաոճին և Նիկոլ Փաշինյանի այն հայտարարությանը, թե իրեն ժողովուրդն է բերել, և եթե անհրաժեշտ լինի, ժողովուրդն էլ կհեռացնի, ակցիայի մասնակիցը նշեց, որ այժմ երևի ըտնտրողների 10 տոկոսն է հավատում վարչապետին։
«2018-ին կարող է ժողովրդի 10%-ը չուզենար Նիկոլ Փաշինյանին, իսկ հիմա շատ-շատ 10% ուզենա՝ չգիտեմ ինչ շահի դիմաց: Ես մտածում եմ՝ պարոն Փաշինյանը հայ ազգին կարելի է ասել` երևի ատո՞ւմ է: Բոլոր կողմերից է այդ նեղությունը տալիս, ոչ թե մենակ տնտեսվարողներին: Հայաթափություն է լինելու, դատարկվելու է Հայաստանը: Մի քիչ մարդիկ սկսեցին աշխատել, նորից ուզում է նեղի, որ դուրս գան: Այս երկրում հնարավոր չի իրենց տեռորով աշխատել: Մենք պահանջում ենք հանդիպում միայն Նիկոլ Փաշինյանի հետ, որովհետև ոչ մեկը ոչ մի արձագանք չի տալիս»,–ասաց կինը:
Խոսելով առկա խնդիրներից` կինը նշեց, որ տնտեսվարողներից շատերը 10 տարվա ապրանք ունեն։ Այդ ապրանքը բերել են, մաքսազերծել են, ԱԱՀ-ն վճարել են և ապրանքը չի վաճառվել։
«Պետությունը միևնույն է` մեզ ԱԱՀ-ն հետ չի տալիս։ Այդ 10,000 արժողությամբ ապրանքը կարող է 1,000 դրամով վաճառվի։ Եթե հիմա այսօր ինքը գույքագրի 5,000-ով, հետո 1,000-ով վաճառի, դա խնդիր է լինելու։ Ապրանքը փչանալ կա, բռակ կա, դրանք լրիվ խնդիրներ են: Բացի այդ, եթե սկսենք գույքագրել, դա պահանջելու է բարձր գներով հաշվապահություն, նաև աշխատատեղ, որը գործատուն չի կարող այդքան վճարել, այդ եկամուտները չունի»,–ասաց կինը։
Հիշեցնենք, որ ակցիա էր անցկացվել նաև հունվարի 23-ին և փետրվարի 5–ին։ Այս ընթացքում հանդիպումներ են եղել կառավարությունում, սակայն առևտրականները դժգոհ են արդյունքներից։