ԵՐԵՎԱՆ, 5 մարտի – Sputnik. Ազգային ժողովն այսօր 64 կողմ, 2 դեմ և 19 ձեռնպահ ձայներով առաջին ընթերցմամբ ընդունեց ԱԺ ՔՊ–ական պատգամավոր Հայկ Սարգսյանի հեղինակած «Հարկային օրենսգրքում փոփոխություններ կատարելու մասին» աղմկահարույց օրինագիծը։
Նախագծով խաղային ոլորտն այսուհետ կհարկվի 10 % շահութահարկով։
Քննարկումների ժամանակ Սարգսյանը նշել էր` եթե 2010 թ․ շրջանառության ծավալները կազմում էին 35 մլն դոլար, իսկ հարկերի հարաբերակցությունը՝ 2,6 մլն դոլար, այսինքն՝ 7,2 տոկոս, ապա 2023 թ․ գործունեությունն աճել է ավելի քան 440 անգամ. 2023 թ․ ծավալները կազմել են 15,8 մլրդ դոլար, իսկ հավաքագրվող հարկերը՝ 67 մլն դոլար կամ ծավալի 0,4 տոկոսը։
Հիշեցնենք, որ փետրվարի 5-ին ՀՀ տնտեսական հարցերի մշտական հանձնաժողովի նիստի ժամանակ «Հարկային օրենսգրքում» փոփոխություններ կատարելու մասին նախագծի քննարկումը բավականին թեժ մթնոլորտում անցավ։
Հայկ Սարգսյանը վիճեց անգամ թիմակից գործընկերների հետ՝ պնդելով, որ օրինագծի հարցը չպետք է հետաձգվի, քանի որ քիչ հարկահավաքության արդյունքում տուժում է պետությունը։
Օրենքի ուժ ստանալու համար նախագիծը դեռ պետք է ԱԺ–ում ընդունվի նաև երկրորդ ընթերցմամբ և ամբողջությամբ։