ԵՐԵՎԱՆ, 20 փետրվարի – Sputnik. Ռուսաստանը հաղթաթուղթ ունի Ուկրաինայի հետ կապված բանակցություններում, քանի որ զգալի տարածքներ է վերահսկում։ Այս հայտարարությունն արել է ԱՄՆ նախագահ Դոնալդ Թրամփը լրագրողների հետ զրույցում։
«Կարծում եմ` ռուսներն ուզում են վերջ դնել պատերազմին: Իսկապես այդպես եմ կարծում: Բայց նրանք հաղթաթուղթ ունեն, քանի որ շատ տարածքներ են գրավել, ուստի առավելություն ունեն», - ասել է նա։
Թրամփը համոզմունք է հայտնել, որ ուկրաինական հակամարտությունը հնարավոր է լուծել մեկ տարվա ընթացքում, այլապես կարող է Երրորդ համաշխարհային պատերազմ լինել։
ԱՄՆ առաջնորդը նաև նշել է, որ իշխանությունները կվերակենդանացնեն Ուկրաինայի հետ հազվագյուտ մետաղների վերաբերյալ գործարքը։ Նրա խոսքով՝ Ուկրաինայի իշխանությունները, հրաժարվելով գործարքից, «կոպիտ են վարվել» ԱՄՆ ֆինանսների նախարարության ղեկավար Սքոթ Բեսենտի հետ, երբ նա Կիևում էր։
Թրամփն ավելի վաղ ասել էր, որ ԱՄՆ-ն Ուկրաինային 200 մլրդ դոլարով շատ օգնություն է տվել, քան Եվրոպան, բայց այդ գումարը վերադարձնելու մեխանիզմ չի մշակվել։ ԱՄՆ առաջնորդն ուզում է Կիևից հազվագյուտ մետաղներ ստանալ ներդրված գումարի դիմաց։
Հիշեցնենք` փետրվարի 18-ին Էր Ռիադում ռուս-ամերիկյան բանակցություններ են կայացել: Ռուսաստանը ներկայացրել են ՌԴ արտգործնախարար Սերգեյ Լավրովը և նախագահի օգնական Յուրի Ուշակովը, իսկ ԱՄՆ-ն՝ նախագահի ազգային անվտանգության հարցերով օգնական Մայք Ուոլցը, պետքարտուղար Մարկո Ռուբիոն և նախագահի` Մերձավոր Արևելքի հարցերով հատուկ բանագնաց Սթիվեն Վիտկոֆը: Բանակցությունների շրջանակում բարձրացվել է նաև ուկրաինական հակամարտության կարգավորման հարցը։