ԵՐԵՎԱՆ, 2 փետրվարի – Sputnik. Վրաստանի մայրաքաղաքում ընդդիմությունն ու նրա կողմնակիցները կրկին բողոքի ակցիաներ են անցկացնում։ Նրանք մասնակի փակել են «Թբիլիսի մոլի» մոտ գտնվող ճանապարհը: Ոստիկանությունը սկսել է ցուցարարներին բերման ենթարկել այն բանից հետո, երբ ուժայինների և ցուցարարների միջև ծեծկռտուք ու վեճ է սկսվել։ Այս մասին հայտնում է Sputnik Գրուզիան։
Ցուցարարները փորձում են ամբողջությամբ փակել ճանապարհի երթևեկելի հատվածը, սակայն իրավապահները թույլ չեն տալիս՝ նրանց վերադարձնելով մայթեր։
Նշվում է, որ բերման ենթարկվածների թվում են «Հանուն փոփոխությունների» կոալիցիայի առաջնորդներից մեկը, ընդդիմադիր «Միացյալ ազգային շարժում» կուսակցության նախկին նախագահ Նիկա Մելիան, ինչպես նաև Թբիլիսիի նախկին քաղաքապետ, Միասնական ազգային շարժման անդամ Գիգի Ուգուլավան։
Առևտրի կենտրոնի հարակից տարածքում ուժեղացվել են անվտանգության միջոցառումները։ Ցուցարարները փակել են երթուղիներից մեկը և գրավել էստակադան։ Երթևեկությունը դարձել է դժվարանցանելի։
Ցուցարարները սկսել են հավաքվել առևտրի կենտրոնի մոտ ժամը 16:00-ից: Նախօրեին Վրաստանի ՆԳՆ-ն ակցիայի կազմակերպիչներին ու մասնակիցներին զգուշացրել էր, որ ռազմավարական նշանակության ավտոճանապարհի փակումն արգելված է օրենքով և պատժվում է Քրեական օրենսգրքով։
Գերատեսչությունը հիշեցրել է, որ միջազգային ճանապարհները ռազմավարական և/կամ հատուկ նշանակության օբյեկտներ են։
Վրաստանում զանգվածային բողոքի ցույցեր են սկսվել անցյալ տարվա վերջին այն բանից հետո, երբ վրացական իշխանությունները հայտարարեցին, որ դադարեցնում են ԵՄ անդամակցության գործընթացը: