ԵՐԵՎԱՆ, 1 փետրվարի – Sputnik. Երևանի Հանրապետության հրապարակում ադրբեջաներեն «Ղարաբաղ» երգողների տեսանյութի տարածողը ձերբակալվել է։ Տեղեկությունը հայտնում է ՀՀ քննչական կոմիտեն։
Ավելի վաղ հայտնել էինք, որ հունվարի 30-ին համացանցում տարածվել էր մի տեսանյութ, որտեղ մի խումբ մարդիկ Երևանի Հանրապետության հրապարակում ադրբեջաներեն լեզվով Ղարաբաղի մասին երգ են երգում։ Հաջորդ օրը ԱԱԾ–ն հաղորդագրություն տարածեց, որ երգողները ԻԻՀ քաղաքացիներ են, իսկ այսօր արդեն առերևույթ հանցանքի մասին հաղորդում էր ներկայացրել ՀՀ քննչական կոմիտե։
Կոմիտեն պարզել է, որ հունվարի 30-ին իր կողմից օգտագործվող «Ռազմավարական հետազոտությունների անկախ կենտրոն» ֆեյսբուքյան էջում տեսանյութը հրապարակել է Ղ․ Բ․–ն։
«Տվյալ անձը տեսանյութի էությունը խեղաթյուրող մեկնաբանություններ է գրել՝ այդ կերպ տարածելով ՀՀ իշխանությունների և ոստիկանության ծառայողների նկատմամբ ատելություն, անհանդուրժողականություն և թշնամանք հրահրելուն ու քարոզելուն ուղղված նյութ և հրապարակային խոսք»,– ասված է ՔԿ հաղորդագրության մեջ։
Նշված արարքը կատարելու համար Ղ․Բ.–ի նկատմամբ հարուցվել է հանրային քրեական հետապնդում ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքը, ինչպես նաև այդ նպատակով նյութեր կամ առարկաներ տարածելը հոդվածով։
Ղ․Բ.–ն ձերբակալվել է և նրա նկատմամբ կալանքը որպես խափանման միջոց ընտրելու միջնորդություն է ներկայացվել դատարան։