ԵՐԵՎԱՆ, 31 հունվարի – Sputnik. ՀՀ պետական եկամուտների կոմիտեի նախագահ Էդուարդ Հակոբյանը Հայաստանի և Իրանի միջև մաքսային և հարկային ոլորտներում փոխադարձ համագործակցության հարցեր է քննարկել ՀՀ–ում Իրանի արտակարգ և լիազոր դեսպան Մեհդի Սոբհանիի գլխավորած պատվիրակության հետ։ Այս մասին հայտնում է ՀՀ ՊԵԿ մամուլի ծառայությունը։
«Անդրադարձ է կատարվել սահմանային անցման կետերի ենթակառուցվածքների արդիականացմանը, երկու երկրների մաքսային մարմինների միջև տվյալների էլեկտրոնային փոխանակման համակարգի լիարժեք ներդրմանը, ինչպես նաև հայ-իրանական սահմանին պարզեցված մաքսային ընթացակարգերի կիրառման հնարավորությանը և օպերատիվ լուծում պահանջող հարցերի արագ արձագանքման մեխանիզմների ստեղծմանը»,–նշված է հաղորդագրության մեջ:
Կողմերը քննարկել են նաև երկու երկրների միջև մաքսային և հարկային հարցերում փոխադարձ վարչական օգնության մեխանիզմների բարելավման ու կատարելագործման հնարավորությունները։
Հանդիպման ավարտին կողմերը պատրաստակամություն են հայտնել առավել ակտիվ համագործակցել նախանշված ուղղություններով՝ հաշվի առնելով երկու երկրների միջև ապրանքաշրջանառության ծավալների աճը, ինչպես նաև սահմանային իրավախախտումների դեմ համատեղ պայքարելու ջանքերը: