Գնդակոծվել է ՌԴ Կուրսկի շրջանը. խաղաղ բնակիչ է տուժել

ԵՐԵՎԱՆ, 30 հունվարի - Sputnik. Սեփական բնակարանում խաղաղ բնակիչ է տուժել Ուկրաինայի զինված ուժերի կողմից ՌԴ Կուրսկի մարզի Ռիլսկի շրջանի զանգվածային գնդակոծության հետևանքով: Այս մասին հայտնել է մարզպետի ժամանակավոր պաշտոնակատար Ալեքսանդր Խինշտեյնը իր Telegram-ալիքում:

Նրա խոսքով՝ «Բարս-Կուրսկ» ջոկատի կամավորները տարհանում են տուժածին, նրան անհրաժեշտ բժշկական օգնություն կցուցաբերվի:

Պաշտոնյան հայտարարել է, որ հարձակման է ենթարկվել նաև Կորենևոյի շրջանը։

«Կորենևոյի շրջանում վնասներ են գրանցվել են մի քանի կետերում․ Կորենևո գյուղում երկու տուն է ավերվել, Նիկիպելովկա գյուղում՝ մեկը։ Կորենևո գյուղում գնդակոծությունից հետո հրդեհ է բռնկվել տներից մեկում։ Հարված է հասցվել նաև Սեկերինո գյուղում գտնվող տնտեսական շինությանը։ Բարեբախտաբար տուժածներ չկան»,-հավելել է Հինշտեյնը։

Մարզպետի ժամանակավոր պաշտոնակատարի խոսքով՝ Telegram-ալիքներում տարածված տեղեկությունն այն մասին, որ հարձակումների հետևանքով մի խումբ կամավորներ են տուժել, չի հաստատվել:

Հիշեցնենք՝ ՌԴ ԶՈւ գլխավոր շտաբի պետ Վալերի Գերասիմովը հայտնել էր, որ 2024թ–ի օգոստոսի 6-ին՝ առավոտյան ժամը 5: 30-ին, Ուկրաինայի զինված ուժերի շուրջ հազար հոգանոց խմբավորումն անցել է հարձակման` նպատակ ունենալով տարածքներ գրավել Կուրսկի մարզում։ Ուկրաինական զինուժի առաջխաղացումը դեպի ՌԴ տարածքի խորքը կասեցվել է։ ՌԴ ԶՈւ գլխավոր շտաբի պետը նշել էր, որ Կուրսկի մարզում գործողությունը կավարտվի, երբ հակառակորդը կջախջախվի, իսկ ռուսական զորքը դուրս կգա ՌԴ պետական սահման։

Ռուսաստանի նախագահ Վլադիմիր Պուտինը, մեկնաբանելով Կուրսկի մարզում տիրող իրավիճակը, հայտարարել է, որ Կիևի ռեժիմը հերթական լայնածավալ սադրանքն է ձեռնարկել, անկանոն կրակոցներ է արձակում, այդ թվում՝ քաղաքացիական թիրախների ուղղությամբ: ՌԴ նախագահը վստահեցրել է, որ հակառակորդն արժանի պատասխան կստանա, Ռուսաստանի զինված ուժերի առջև դրված բոլոր նպատակներին կհասնեն:

Կուրսկի, ինչպես նաև Բելգորոդի և Բրյանսկի մարզերում քաղաքացիների անվտանգությունն ապահովելու համար հակաահաբեկչական գործողության ռեժիմ է սահմանվել։