ԵՐԵՎԱՆ, 15 դեկտեմբերի – Sputnik. ԱՄՆ վերաքննիչ դատարանը չինական Bitte Danke ընկերությունից պահանջել է մինչև հունվարի 19-ը վաճառել TikTok հավելվածը՝ Նահանգներում այն փակելու սպառնալիքով, հայտնում են ամերիկյան լրատվամիջոցները: Գերագույն դատարանում բողոքարկման համար ընկերությանը մեկ ամսից մի փոքր ավելի ժամանակ է մնում։
Այս որոշումն ընդունվել է ԱՄՆ Կոնգրեսի վերջերս ընդունված օրենքի համաձայն, որը երկրի իշխանություններին թույլ է տալիս արգելել ցանկացած արտասահմանյան էլեկտրոնային հարթակ, որը կարող է «անհանգստություն առաջացնել ամերիկացիների տվյալների հավաքագրման հետ կապված» (հարթակն ԱՄՆ-ում մոտ 170 մլն ակտիվ օգտատեր ունի): Այդ մտահոգությունները հատկապես վերաբերում են չինական հարթակներին, նշել է ԱՄՆ արդարադատության նախարարությունը։
Այս կապակցությամբ TikTok-ի ղեկավարությունը հայտարարել է, որ ամերիկացի օգտատերերի տվյալները պահվում են ամերիկյան Oracle ընկերության սերվերներում, իսկ ալգորիթմները, որոնք նոր տեսանյութեր են առաջարկում ամերիկացի օգտատերերի համար, նույնպես պատվիրվել են Նահանգներում։
Հատկանշական է, որ հունվարի 19-ին ավարտվում է ԱՄՆ ներկայիս նախագահ Ջո Բայդենի վարչակազմի լիազորությունների ժամկետը։ Նորընտիր նախագահ Դոնալդ Թրամփն իր կառավարման առաջին ժամկետի ընթացքում անհաջող փորձել էր արգելափակել TikTok-ը, սակայն իր վերջին նախընտրական քարոզարշավի ժամանակ հակառակն է հայտարարել՝ նշելով, որ թույլ չի տա փակել այն: