ԵՐԵՎԱՆ, 25 նոյեմբերի – Sputnik. «Քաղաքացիական պայմանագիր» խմբակցության պատգամավոր Հովիկ Աղազարյանը որոշել է դեռ վայր չդնել մանդատը։ Նա այս մասին ասաց Sputnik Արմենիայի հետ զրույցում։
Ավելի վաղ նա հայտարարել էր` մանդատը վայր դնել-չդնելու հետ կապված արդեն որոշում է կայացրել, և այն կհրապարակի նոյեմբերի 25–ին։
«Ես ժամկետ խոստացա, սակայն, փաստորեն ես սխալվեցի։ Դրա համար ներողություն եմ խնդրում, հիմա չեմ կարող ասել, թե երբ կհրապարակեմ որոշումս։ Հարցեր ունեմ պարզաբանելու ինքս ինձ հետ, դրանից հետո նոր կկողմնորոշվեմ»,– ասաց նա։
Նա չժխտեց, որ այսօր հանդիպել է ԱԺ նախագահ Ալեն Սիմոնյանի հետ։ Արդյոք նրա որոշման վրա ազդել է Սիմոնյանի հետ հանդիպումը, Աղազարյանը վստահեցրեց. «Ո՛չ, չի ազդել»։
Պատգամավորը նաև տեղեկացրեց, որ իր որոշումը կհրապարակի մոտ օրերս` ԶԼՄ–ներից մեկի հարթակով։
ՀՀ վարչապետ Նիկոլ Փաշինյանը նոյեմբերի 22-ին Հանրային հեռուստաընկերությանը տված հարցազրույցում հայտարարեց, որ ԱԺ պատգամավորներ Նարեկ Զեյնալյանին և Հովիկ Աղազարյանին խնդրել է վայր դնել մանդատները: Նարեկ Զեյնալյանը հետևել էր Փաշինյանի հորդորին։ Աղազարյանը հաջորդ օրը հայտարարեց, որ որոշում կայացրել է, բայց այն կհրապարակի նոյեմբերի 25-ին։
Ինչպես արդեն հայտնել ենք, հոկտեմբերի 15–ին խորհրդարանական լսումների ժամանակ կրքերը թեժացան, երբ Հովիկ Աղազարյանը դիտողություն արեց ՀՀ ՔԿ նախագահ Արգիշտի Քյարամյանին։ ՔԿ ղեկավարը պատգամավորին խնդրեց կոռուպցիայի դեմ պայքարի, հովանավորչության համատեքստում մեկնաբանել, թե ինչ ինչով է պայմանավորված, որ առնվազն երկու անգամ իրեն դիմել են Աղազարյանի տղայի հետ կապված քրեական գործով։
Քյարամյանի արած հայտարարության վերաբերյալ ավել ուշ նախաձեռնվեց քրեական վարույթ, իսկ մամուլը սկսեց գրել, որ Աղազարյանը շուտով վայր կդնի մանդատը։
Հավելենք, որ կառավարության վերջին նիստում ՀՀ վարչապետի արած հայտարարությունից հետո Քյարամյանը հրաժարական տվեց։ Փաշինյանը նոյեմբերի 22-ին հայտնեց, որ մտադիր է ՀՀ գլխավոր դատախազի տեղակալ Արթուր Պողոսյանին առաջադրել քննչական կոմիտեի նախագահի պաշտոնում։