ԵՐԵՎԱՆ, 22 նոյեմբերի – Sputnik.ՀՀ վարչապետ Նիկոլ Փաշինյանը հաստատեց, որ պաշտոնյաներին sms հաղորդագրությամբ է հայտնել պաշտոններից հրաժարվելու մասին։
«Կիրակի օրը` այո՛, ուշ երեկոյան` ո՛չ, sms հաղորդագրությամբ` այո՛, որովհետև այստեղ կան նրբություններ` քաղաքական, իրավական, բարոյական։ Ես կարևոր եմ համարել, որ այն, ինչ ասում եմ, լինի գրավոր։ Բանավոր խոսակցությունը վատ չէ, բայց դրա շուրջ կարող են լինել շատ լայն մեկնաբանություններ և տարընթերցումներ։ Իմ փորձը ցույց է տալիս, որ այնտեղ, որտեղ խոսքը գրավոր է, ավելի արդյունավետ է, հետագա տարընթերցումների տարածքը` ավելի քիչ»,–ասաց Փաշինյանը Հանրային հեռուստաընկերությանը տված հարցազրույցում։
Նա նաև ընդգծեց, որ պաշտոնանկությունների վերաբերյալ իր որոշումը եղել է միանձնյա, որովհետև վարչապետն ունի իր լիազորությունների շրջանակը և կարող է այդ պատասխանատվությունը ուրիշների հետ չկիսել։
Հիշեցնենք` կառավարության նախորդ նիստում ՀՀ վարչապետ Նիկոլ Փաշինյանը հայտարարեց, որ իր համբերության բաժակը լցվել է և իրավապահ համակարգից կոնկրետ արդյունքներ է պահանջում։ Նոյեմբերի 17-ին լրատվամիջոցները գրեցին, որ ՏԿԵ նախարար Գնել Սանոսյանը և ՀՀ ՊԵԿ նախագահ Ռուստամ Բադասյանը, ՔԿ ղեկավար Արգիշտի Քյարամյանը, ինչպես նաև ՆԳ նախարար Վահե Ղազարյանը աշխատանքից ազատվելու դիմումներ են ներկայացրել։
Բարձրագույն դատական խորհրդի նախագահ Կարեն Անդրեասյանը նոյեմբերի 18-ին ֆեյսբուքյան էջում գրեց, որ հրաժարական է տալիս` առանց խոսելու խորքային պատճառների մասին։ Ավելի ուշ հայտնի դարձավ, որ ազատման դիմումներ են գրել նաև Հակակոռուպցիոն կոմիտեի նախագահ Սասուն Խաչատրյանը, ՀՀ ներքին գործերի նախարար Վահե Ղազարյանը, ՀՀ քննչական կոմիտեի նախագահ Արգիշտի Քյարամյանը, ՀՀ տարածքային կառավարման և ենթակառուցվածքների նախարար Գնել Սանոսյանը, ՀՀ պետական եկամուտների կոմիտեի նախագահ Ռուստամ Բադասյանը։