ԵՐԵՎԱՆ, 22 նոյեմբերի – Sputnik. ՀՀ վարչապետ Նիկոլ Փաշինյանը մտադիր է ՀՀ գլխավոր դատախազի տեղակալ Արթուր Պողոսյանին առաջադրել քննչական կոմիտեի նախագահի պաշտոնում։ Նա այդ մասին հայտնեց Հանրային հեռուստաընկերությանը տված հարցազրույցում։
Արթուր Պողոսյան
© Photo
Այն դիտարկմանը, որ նրա անունը շրջանառվում է կոռուպցիոն ինչ-որ սկանդալների մեջ, Փաշինյանը պատասխանեց, որ 2020 թ․ Պողոսյանը նշանակվել է ԱԱԾ քննչական դեպարտամենտի ղեկավար, և այդ նույն ահազանգերը այդ ժամանակ էլ է ստացել։
«Շատ խորը ուսումնասիրություններ են իրականացվել, ու այդ ահազանգերը հիմնավոր ձևով հերքվել են։ Վերջին օրերին այդ ահազանգերը նորից վերակենդանացել են և ևս մեկ անգամ ստուգվել ու հերքվել են»,- հայտարարեց նա։
Հարցին, թե արդյոք ՀՀ պետական եկամուտների կոմիտեի նախագահի պաշտոնում ևս ունի թեկնածու, Փաշինյանն արձագանքեց, որ թեկնածուները մի քանիսն են, որոնց հետ ավելի մանրամասն կշփվի և քննարկումներ կունենա, որոշում կընդունի՝ ով կլինի ՊԵԿ նախագահ։
Հիշեցնենք` կառավարության նախորդ նիստում ՀՀ վարչապետ Նիկոլ Փաշինյանը հայտարարեց, որ իր համբերության բաժակը լցվել է և իրավապահ համակարգից կոնկրետ արդյունքներ է պահանջում։ Նոյեմբերի 17-ին լրատվամիջոցները գրեցին, որ ՏԿԵ նախարար Գնել Սանոսյանը և ՀՀ ՊԵԿ նախագահ Ռուստամ Բադասյանը, ՔԿ ղեկավար Արգիշտի Քյարամյանը, ինչպես նաև ՆԳ նախարար Վահե Ղազարյանը աշխատանքից ազատվելու դիմումներ են ներկայացրել։
Բարձրագույն դատական խորհրդի նախագահ Կարեն Անդրեասյանը նոյեմբերի 18-ին ֆեյսբուքյան էջում գրեց, որ հրաժարական է տալիս` առանց խոսելու խորքային պատճառների մասին։ Ավելի ուշ հայտնի դարձավ, որ ազատման դիմումներ են գրել նաև Հակակոռուպցիոն կոմիտեի նախագահ Սասուն Խաչատրյանը, ՀՀ ներքին գործերի նախարար Վահե Ղազարյանը, ՀՀ քննչական կոմիտեի նախագահ Արգիշտի Քյարամյանը, ՀՀ տարածքային կառավարման և ենթակառուցվածքների նախարար Գնել Սանոսյանը, ՀՀ պետական եկամուտների կոմիտեի նախագահ Ռուստամ Բադասյանը։